陳鈺芸驚遇露體狂

歌手陳鈺芸昨日於商場活動上報警聲稱遇露體狂，被嚇窒兼即場喊爆，她憶述事發經過時說：「見到好多黑色毛毛！」而三魂唔見七魄的她卻一度烏龍錯認一名粉絲為狂徒！

曾參與荷里活電影演出的香港歌手陳鈺芸（JuJu），昨日與梁佑嘉、區文詩等出席商場活動時，報稱於活動期間遇露體狂。JuJu表示即時擰歪面及嚇到腦海一片空白，事後變大喊包，工作人員為她報警。驚魂甫定的她說：「上台前聽到有人叫我，我行去欄杆度幫佢簽名，點知有個男人拉開條褲，當時見到好多黑色毛毛，好驚！未試過咁近遇到露體狂，好彩有欄杆。（對方處於興奮狀態？）『黑麻麻』，唔敢望。」

警方到場後，根據JuJu提供的資料向一名在場男子進行調查，在其身上搜出精神病歷卡，列為「傻人發現」事件處理。警察公共關係科表示，事件中女受害者稱該男子並非涉案的露體狂。

冇出招擒狂徒遺憾到喊

事後再問JuJu為何前言不對後語？「點錯相」的她說：「當時好多身邊人都話係呢個人，導致我認錯人，警方事後同我講話喺嗰名男子身上搵到我嘅簽名碟，我先記得真正露體狂係畀咗張立立令嘅紙我簽。」精通雙節棍的她指當時未能即時反應過來，以功夫捉狂徒：「我喊係因為唔可以即時捉住佢同打佢，畀佢逃之夭夭。」

同場的區文詩指讀書時曾遇同學露體：「佢條波褲好短，凸咗個器官出嚟。」又笑指連母親亦向她追問好友吳雨霏與余文樂的戀情。裕美則自爆「樂霏」被影到在赤柱拍拖當日，自己亦與男友人在該處沙灘。