杜汶澤開騷吊高周秀娜

杜汶澤的Talk Show請來神秘嘉賓周秀娜以太空人裝扮打頭陣亮相，更先後被吊高兩次，阿澤除大講有味笑話外，又不忘將圈中好友擺上枱，且自揭風流韻事趁機向太太田蕊妮示愛，全場笑中有淚。

阿澤一連三場的《咔啦騷》前晚於會展揭開序幕，汪明荃、陳志雲及蔡卓妍等圈中好友特意捧場，過氣情侶吳浩康及莊思敏更大方合照。周秀娜擔任神秘嘉賓，以太空人裝扮亮相，被威吔吊高兩次，阿澤見狀即大灑鹽花：「大家畀480蚊，估唔到有得『吊』周秀娜，仲要『吊』兩次喎！」全場隨即起哄，他笑說為對方出口冤屈氣：「你前男友趁你唔知，帶咗其他女仔『上太空』，我依家就眾目睽睽帶你上太空，我好有義氣嘅。」娜姐即說：「我做人好腳踏實地嘅。」

寸亞視藝員冇人識

入行前曾欠下「貴利」避走台灣的阿澤，獲前亞視監製蕭鍵鏗簽約做藝員，卻擔心再遭追債：「佢同我講唔使驚，因為喺亞洲電視本港台當藝員，做明星做一世冇人知o架！」不留情面寸爆亞視。談到入行後與第一任妻子簽字離婚，阿澤歸根究柢錯在年少輕狂：「溝無綫嘅女全世界都知，但喺亞視溝女溝咗連佢自己都唔知。」他更不諱言與阿田結婚後，夜蒲時對方坐在身旁，亦試過與異性激吻，反而老婆對他出軌行為相當忍耐：「到我得罪人冇戲拍嘞，阿田話仲有佢喺身邊。我祝台下每位男士都搵到你哋心目中嘅田蕊妮，但女士千祈唔好遇到杜汶澤。」

除自揭糗事，阿澤少不免拿身邊好友包括吳君如、杜德偉及林峯等開玩笑，他更將余文樂與吳雨霏的緋聞擺上枱：「當年我結婚，吳雨霏（Kary）有份做姊妹，余文樂同我講覺得佢好靚女，我就話叫佢努力搵錢先好追人。」完騷後阿澤接受訪問，直認事前一切內容「保密」：「等我24號完騷，休息番一日，26號咪打去同啲朋友講聲囉！（當年睇得出阿樂鍾意Kary？）邊Feel到吖，但Talk Show內容有九成真。（老婆都唔知你講佢啲嘢？）佢都唔知o架，今日仲要去澳門做嘢。（老婆外家知你咁對佢哋個女，唔使解畫？）唔使，都浪子回頭咯！」