張暖雅「懶醒」累好友見紅

性感女星張暖雅（Angelina）趁新年豪花逾3萬港元，與友人到柬埔寨小島旅行，玩足五日四夜，更獲當地人貴賓式款待：「一去到所有職員都企定接我哋，又遞毛巾又送果汁，仲24小時任叫龍蝦、紅酒、白酒等，由米芝蓮廚師炮製，好好食，搞到我肥咗6磅！朝早又派800蚊利是畀我，但兌番原來得1.5港幣。之後仲親手寫信畀我，雖然啲中文超爛，但好Sweet！」她又大讚島上所有東西如飲管和紙巾，均用竹或木料製成，十分人性化。

不諳水性的Angelina出海玩浮潛，更釣得如小腿般大的老鼠斑及東星斑，不過好友卻被她搞到「見血」：「朋友猛拉我走，點知佢唔小心捉錯海膽，成百條刺拮入手！醫生話消毒就OK，但見佢手法生疏，好似唔可信，我就叫佢挑啲刺出嚟，結果搞到朋友成手都係血，事後我上網查，原來啲刺唔使挑，會畀身體吸收。」