亢帥克抽中五舊水大獎

亞視昨日舉行抗通脹新春團拜,花一萬元擺六圍盆菜宴,而「亞洲之子」亢帥克行運行落腳趾尾,抽得終極大獎五百大元過肥年,並識做地高呼多謝ATV!

無綫今年派加碼利是,全台員工各獲六百元利是袋袋平安,並享有兩餐豐富盆菜宴。而亞視繼推出演藝訓練班讓旗下藝人增值後,昨日假亞視總台舉辦新春團拜,埋單計以約一萬大元擺六圍盆菜宴連抽獎!香港近年通脹加劇,能在約一萬元成本下搞新春團拜實屬難得,在免場租、免代支、免加一「三免」下,亞視可好好控制成本,盆菜有蝦、雞、鴨、豬皮及魚蛋等一般菜式,鮑魚及海參等貴價食材完全欠奉,盛惠1,050元一圍絕不過分,但有亞視員工表示要食餸尾,未知是否亞視響應環保之舉。

下星期再搞

昨日最開心的莫過於「亞洲之子」亢帥克,日日有上堂的他終於得到回報,抽中壓軸大獎五百元大利是,難怪他上台領獎時全場掌聲雷動,他還興奮高呼:「多謝亞視!」其後在微博再多謝亞視。其實大抽獎還有一百元超市禮券及二百元現金獎,並有張家瑩、顏子菲及黃集鋒等藝員載歌載舞,「咪嘴」唱賀年串燒歌。記者致電亞視高層葉家寶,他強調今次團拜絕無贊助,全是公司給錢與藝人和傳媒同樂,他又透露將於本月28日再搞內部團拜,順便預祝三月星辰,屆時大抽獎更有鑄金擺設。問到是否覺得盆菜宴寒酸?他說:「大家旨在開心,最緊要係團結,食乜唔重要,我哋唔想有咁多廚餘,我哋有蝦o架!」而亞視執行董事盛品儒提到日前與香港電視主席王維基出席同一活動時,被指拒和對方合照,他尷尬地解釋:「冇啲咁嘅事,嗰日好熱呀!成廿六度,非常熱!加上節目差唔多開始,人比較多,冇留意到,之後佢拍咗我一拍,我有同佢笑一笑!」

專案組

幸運的亢帥克抽中終極大獎,勁!

張家瑩落力表演娛賓,大搞氣氛。

高層盛品儒(左)席間大派利是,員工收到笑晒口。

亞視藝員圍埋一齊歎盆菜,正!