祖名認孖霆鋒睇舖

投資有道的謝霆鋒，早年購下中環擺花街多個舖位，不甘只做地舖王的他，被最新一期《好報》獨家爆料，指早前孖住好兄弟房祖名出巡到中環，並沿着皇后大道中一帶視察甲級商廈。祖名被問及此事時，笑說：「睇吓舖啫！」

現年32歲的謝霆鋒，除是製作公司「PO朝霆」CEO外，向來投資有道的他，去年於兩個月內分別斥資1.17億元及9千多萬元購下中環擺花街26號及28號舖，而早年亦以2千多萬元買入擺花街壹號廣場地下6至8號舖，現已升值至1.2億元，短短八年間已躋身億萬富豪行列。

甲級商廈有潛力

野心勃勃的霆鋒，似乎不甘只做擺花街舖王，自從政府去年推出加強版額外印花稅後，有意將資金轉炒商用物業，睇準甲級商廈發展潛力。霆鋒被《好報》獨家爆料，指孖住好兄弟「龍之子」房祖名現身中環歎紅酒。身穿型仔西裝的霆鋒與便服打扮的祖名，步出後沿着皇后大道中一帶並肩而行，邊行邊密密斟，當記者上前問兩人神神秘秘搞乜？祖名說：「傾嘢啫！」而霆鋒一臉認真地說：「好大事囉！（然後伸手指向前面幾幢甲級商廈）都係呢幾幢囉！」問到是否有意收購？他說：「係呀！（係咪收購埋彤叔（鄭裕彤）棟新世界？）唔敢、唔敢。」

兩人跟記者傾完一輪，便乘車到荷李活道餐廳晚膳，醫肚後，意猶未盡的他們，仍繼續於附近散步吹水。昨日記者就睇舖一事致電祖名，他說：「嗰日得閒睇吓舖啫！都有傾吓生意經，不過都係好初步。」