峯語分房瞓冇得曳曳

吳千語與男友林峯到東京度新歲回港後，昨日神采飛揚地出席公開活動，她強調出發前母親已經知道，並重申此行與林峯是分房瞓，又透露與男友到銅鑼灣共進晚餐度過首個情人節！

為了捍衞女友吳千語BB，「責任男」林峯早前單向對外公開「峯語」戀。二人亦結伴在上海出發到東京度新歲，愛得癡纏。叉足電回港的吳千語昨日精神爽利地出席時裝品牌活動，先透露與男友到銅鑼灣共進晚餐慶祝情人節：「仲有幾個朋友，食飯一班人開心啲！（收到咩禮物？）未收到。」對於林峯早前透露想與女友拖手行銅鑼灣，問到有否如願進行，她說：「冇，想低調啲！」

準外母御准遊日

對於東京之旅，吳千語指母親事前已得知：「去咗幾日，開心嘅！（預支蜜月？）其實係幾個朋友一齊去，都冇諗過畀人知。（與朋友同房？）我哋有男有女，呢啲太私人嘅嘢唔想講，但係分開房嘅！」記者追問是否與林峯分房瞓，她點頭示意。她又否認到了廈門探望林峯家人，但承認有透過電話向兩老拜年。

吳千語坦言不知道林峯會單方面公開戀情，得知後感到愕然又開心，她說：「感激佢幫我澄清同維護，好欣賞佢呢樣嘢，我冇諗過佢會咁講！（林峯粉絲有意見！）每樣嘢都有人鍾意有人唔鍾意，工作後放鬆吓好正常！（你係林峯喺拍拖期間公開嘅女友？）開心嘅。（佢好有承擔？）佢不嬲都係，好有責任感。」

她強調與林峯由相識到拍拖是循序漸進，問到林峯的追求攻勢時，她說：「呢啲留番畀自己啦，小秘密！」（有咩優點？）細心啦、對朋友好，男仔最重要有責任感！」雖然年僅19歲，但她表示與33歲的林峯相處沒有問題：「佢性格好小朋友，佢鍾意嘅嘢，話題都溝通到嘅！（情侶檔拍戲？）唔知，公司安排。」活動完結後，她乘七人車先到觀塘工作，至傍晚六時離開並再到鰂魚涌公司，問到會否與林峯吃飯，她愕然說：「我返公司呀！」