富貴佘詩曼瞄準獨立屋

北上搵銀的佘詩曼賺個盆滿缽滿，她有個港人大多遙不可及的蛇年願望：擁有一間獨立屋，一家人齊齊整整、平平安安地生活，而她最近跟媽咪學整祖傳的秘製蘿蔔糕，希望薪火相傳！

眾所周知，佘詩曼是圈中小富婆，名下物業價值數以千萬計，而阿佘的蛇年願望很簡單，就是家肥屋潤，再買大屋，令一家人住得更舒服：「想買三層嗰啲屋仔，同阿哥、阿嫂同媽咪一齊住，希望今年可以實現啦！」近年轉戰內地的阿佘並非大想頭，豪氣的她希望擴張物業版圖至內地：「我細佬喺上海，有叫佢幫我留意，過埋年先再睇吓！」

難得有假過年

搏命搵錢的阿佘近年連農曆新年都冇假放，猶幸今年有個悠長假期，令她可安心留港過年：「今年好開心新年有假放，都幾年冇試過喇，仲放咗好耐添，有好充分嘅時間Prepare過年，譬如跟媽咪學整蘿蔔糕、年糕同油角！」原來阿佘的婆婆祖傳秘製賀年食品配方，為免失傳，平日甚少下廚的她親入廚房，跟媽媽學整蘿蔔糕：「以前淨係顧住食，因為整蘿蔔糕係我婆婆傳落嚟嘅，但婆婆整時我讀緊小學，所以當時一啲興趣都冇，後尾婆婆走咗，到媽咪整，咁如果我唔學就失傳。所以每逢新年都會不期然諗起我婆婆，對佢嘅思念會特別濃，因為嗰時佢整呢啲過年食品，係唔肯畀我哋入廚房，佢話我哋喺入面搞亂晒係唔吉利，我屋企就係咁傳統同神秘，希望呢種廚藝可以薪火相傳！」

想同家輝鬥戲

至於會否將家傳秘方傳給將來的孩子，阿佘直言沒想到這麼長遠：「等我搵到個適合嘅另一半先啦！如果有小朋友係幾開心，但大肚過程又唔過癮，做媽咪實在好偉大！」而電視大戰一觸即發，梁家輝等影帝、影后級人馬大有機會返無綫拍劇，阿佘說：「未知喎！但有聽過梁家輝有機會返嚟拍劇囉！當然希望有機會同影帝級合作，要睇TVB安排，我要睇有好劇本先，都想返去拍o架！」