Bobby昏迷 ICU插喉

無綫藝員歐陽震華前晚偕謝天華、陶大宇及郭政鴻等好友食開年飯慶新歲，期間疑飲酒後酒精中毒，昨凌晨急送入ICU。據悉，他曾一度昏迷，經診治後已恢復意識，其妻昨日探病後眼紅紅離開！

現年52歲的歐陽震華（Bobby）前晚大年初二，相約圈中好友謝天華、陶大宇、郭政鴻及吳卓羲等於一名圈外朋友家食開年飯，據知席間眾人打牌耍樂，在歡樂氣氛感染下，不忘飲多兩杯盡興。

太太為傅老榕孫女

眾人玩至昨凌晨四時許，Bobby突然嗌眼瞓，其現任太太、已故澳門賭王傅老榕孫女傅潔嫻（Rosanna）察覺夫婿面色不妥，即叫白車，漏夜送他往灣仔律敦治醫院，隨即被送入深切治療部（ICU）診治。昨午二時許，大批傳媒在醫院守候，院方於ICU門外圍上黑板以防拍攝，並派保安到場。Bobby的經理人Lydia在男友人陪同下入內探望，約十分鐘後主動步出接受訪問，她否認Bobby入院是飲酒太多所致：「了解過話冇事，食錯嘢落錯格導致肺炎。」她指Rosanna情緒尚可，問到Bobby是否已度過危險期，她說：「冇事、冇事，但要繼續留ICU觀察。」

需留院一星期

至下午四時半，經理人偕Rosanna再度探望Bobby，逗留一小時後，經理人再發言指Bobby已恢復意識，但尚未完全清醒：「因為佢食咗藥插緊喉，要留院一星期左右。（幾時由ICU轉入普通病房？）快o架喇！」

戴上口罩的Rosanna離開時一度雙眼通紅，問到Bobby情況，她只淡淡地說：「OK嘅，冇事、冇事。」對於一度傳出Bobby昏迷，經理人透過電話補充說：「其實都暈咗一陣，但依家醒番，醫生照晒各樣嘢，休息緊，應該要向劇組請假。」探病後，估計Rosanna已返回於白建時道的豪宅寓所。

陶大宇：佢係飲多咗

其實Bobby出事前數天，仍精神奕奕，不時開懷大嚼，上周六（年廿九）他於微博上載捧着海膽的照片，今次突然病重，有份送他入院的郭政鴻及陶大宇都表示擔心，郭政鴻指Bobby送院時仍清醒：「醫生話冇問題，佢只係飲咗少少，我諗係佢工作上攰，所以先有啲唔舒服。」陶大宇直言當時是為穩陣起見，故送Bobby往醫院檢查：「佢係飲多咗，見佢唔係好妥，醉醉哋，所以送佢入院。」至於與太太早走的謝天華坦言不知Bobby不適，他得悉後亦表愕然：「（飯局）見佢好精神冇嘢，當晚佢都係有飲少少、食吓嘢，好似平常食飯咁。」

出事時序

年廿九 開始不適

‧Bobby分享海膽照，歡笑人前，但原來同日曾透露不舒服。

大年初一 笑迎新歲

‧於微博上載同劇拍檔關詠荷及梁舜燕照片，恭喜大家發財。

大年初二 樂極生悲

‧Bobby夫婦與多位老友食開年飯，期間舉杯同飲。

‧飯局期間，Bobby突感不適，太太即召白車將他送院，院方同時於ICU門外圍黑板，Bobby的經理人隨後抵達。

大年初三 留院治療

‧Bobby仍需留院於深切治療部接受治療，其妻探望後眼紅紅離開醫院。