一姐Fiona玩謝師兄

年初三赤口易惹口角爭執，不宜外出拜年，不過鬼妹仔性格的薛凱琪（Fiona）一向百無禁忌，與陳奐仁（Hanjin）以師兄師妹身份率領旗下一眾歌手齊齊團拜，果然眾人甫見面便吵個不停，九星齊鬥嘴相當應節。

今年太陽娛樂文化人才濟濟，日前公司舉行新年團拜活動，兼順道應節齊齊「赤口一番」，Fiona見到作唐裝打扮的同門師兄Hanjin即大叫：「嘩，死啦！你今日着得咁靚仔嘅？」搞到Hanjin忍不住要啋過Fiona：「新年流流唔可以『死死聲』咁唔吉利o架！初三係赤口，你知唔知點解呀？」最愛講「冷笑話」的Fiona隨即爆「爛Gag」：「我梗係知！赤口即係青口個兄弟嘛！」想不到Hanjin竟幫她「接龍」：「乜唔係大口個兄弟咩？」此時小肥亦插嘴說：「係粗口個兄弟先啱！」而As One四人則齊聲說：「好似我哋咁多口就真！」眾人甫碰面便七嘴八舌地窒來窒去！

一班同門先向「公司一姐」Fiona拜年，Fiona隨即指着As One謙稱只是小師妹：「佢哋簽約先o架！佢哋先係師姐，我呢啲新嚟新豬肉！」她又指一向不迷信，吃蘿蔔糕是唯一的「新年傳統」：「呢幾年媽咪連利是都唔封畀我喇！但係我哋每年都會勁食蘿蔔糕，係早午晚三餐都食，最高紀錄試過食晒七底，因為真係太好味喇！」

盼賺錢買大屋

來自新加坡的Hanjin希望新一年賺大錢買大屋，在香港落地生根，但未有生蛇B大計：「慢慢嚟啦！養小朋友唔容易，想享受多啲二人世界先！」而新加入公司的「巨聲幫」陳慧敏則賣口乖大讚師兄師姐非常好人，更點名讚小肥體貼，不過卻堅決否認兩人有發展機會：「佢係好細心同教識我好多嘢！但一定唔會日久生情，因為佢年紀實在……唉！總之佢點都係我前輩啦！」