謙仔帶Toby「開房」

已有女友楊怡的羅仲謙於今日播出的新劇中，與梁靖琪共譜童話戀曲，二人日前到主題樂園，率先感受情人節的浪漫氣氛！

情人節將至，羅仲謙撇低正印女友楊怡，與梁靖琪（Toby）到主題樂園感受情人節氣氛！目的是為延續二人在新劇《戀愛季節》的「餘情」，希望一雙一對的粉絲跟他們一樣冧到爆。

他倆先與米奇、米妮這對經典卡通情侶拍照，又到堡壘前的桃花繞圈行，希望令桃花運更旺，及後再到酒店享用情人節晚餐，並由廚師親自款待，他倆更在套房享用大餐，極盡溫馨。謙仔有女友、Toby已嫁人，但二人仍能如此癡纏，原來早有默契！謙仔說：「好彩我哋合作過演情侶，我不嬲都慢熱，同對手唔熟好難做戲！但Toby係『男人』，冇乜避忌，所以演對手都冇問題，我哋勝在了解對方底線。」

糖妹睇咀戲嘩嘩聲

問到有否親熱戲？Toby說：「有呀！不過冇重口味，只係小激，同劇嘅糖妹（黃山怡）見我哋錫完就『嘩嘩』聲，因為佢哋係新人，未正式拍過接吻戲，所以覺得好勁。好在我同謙仔幾好朋友，一拍即合！」