薛凱琪落同志Bar：跳得開心

「喜愛夜蒲」的薛凱琪（Fiona）被《好報》獨家拍得上月到中環豪放夜蒲，先後吸引三名猛男埋身肉搏。Fiona昨日接受電話訪問時解釋當日是與好友到同志Bar狂歡，不擔心因而遭誤會性取向！

薛凱琪（Fiona）入行以來緋聞不絕，連蒲腳亦清一色是男生，更搞笑的是每次夜蒲均飲醉收場。Fiona上月被《好報》獨家拍得到中環夜蒲，身穿性感露背戰衣的她，一晚連環吸引三名猛男埋身，戰績彪炳！

當晚一落場已連飲幾杯的Fiona，未落舞池已吸引「狂蜂A」上前咬耳仔搭嗲，二人大玩纏綿「黐手」，其後她在舞池中再連環遇上「浪蝶B」及「餓狼C」埋身肉搏！先由「浪蝶B」來個心口貼心口的「連體嬰」式熊抱，冧得Fiona哈哈大笑，再由「餓狼C」加入戰團大玩「人肉三文治」，左擁右攬的精彩戲碼令現場升溫！期間「餓狼C」除用手直落掃勻Fiona的香肩、背脊、蛇腰及Pat Pat外，更與Fiona齊齊聞歌起舞，在舞池中「Un」個痛快。雖然Fiona一直表現忘我兼High爆，但其後則一臉疲態躲在一角，估計是叉電！

做嘅嘢要見得光

Fiona昨日接受本報電話訪問，直認當晚玩得相當盡興：「我嗰日去咗男同志Bar，因為播咗兩首我嘅歌，其中一首係《886》，所以跳得好開心！其實大家唔使太過愕然，我難得放假梗係同朋友玩得開心啦！我舅父同我講，我喺公眾場合做嘅嘢全部都要見得光，所以我唔擔心人哋覺得我點，我唔想因為藝人或工作嘅身份而有所避忌。」她又指不怕因落同志Bar玩而遭誤會性取向。