JW挑機舞蛇標冷汗

天王黎明旗下愛將JW雖然嬌小玲瓏，但勇氣可嘉，為求來年金蛇入屋行大運，挑戰膽量「撚金蛇」。搞鬼的李治廷及應昌佑更不時用「金蛇」嚇到JW o依嘩鬼叫，場面爆笑！

藝人JW、李治廷（Aarif）及小登科的應昌佑（Charles）齊齊「撚蛇」迎新春，寓意新一年金蛇入屋行大運，豈料JW一見金蛇即嚇到o依嘩鬼叫，相反Charles和Aarif則跟蛇仔玩得忘形，更不時「隊嚟隊去」嚇JW。不過JW都相當叻女，跟蛇仔培養完感情，就鼓起最大勇氣與蛇共抱，她說：「初時見到啲蛇嚇到標晒汗，但我都突破到自己嘅恐懼，係蛇年嘅好開始！」

克服恐懼迎桃花

問到JW會否想催旺桃花？她笑說：「哎吔！好怕醜添，呢啲嘢真係隨緣o架！理想對象一定要錫我同遷就我，樣就其次啦！」在旁的Charles與Aarif聽罷就互打眼色偷笑，似乎暗示JW「好事近」。

而新婚的Charles首次派利是，揚言絕不留手，又透露「造蛇計劃」，他說：「最想生女先，因為大女可以幫手湊囝囝！」Aarif則大呻早年犯太歲，搞到多次入院，所以祈求來年工作順利和身體健康。至於新年可有難忘趣事？Aarif大爆烏龍事：「細個飲咗神枱茶，搞到畀嫲嫲話！」原來JW每逢新年都會變「阿四」：「我負責服侍長輩，斟茶遞水兼清理瓜子殼。」Charles則期待與老婆一起布置家居，他說：「媽媽每年都會寫揮春，今年可以同老婆一齊貼一齊掛。」勁溫馨！