張繼聰演得衰老婆晚晚鬧爆

藝人張繼聰（Louis）在無綫劇《老表，你好嘢》中憑型爆「宋為潮」一角彈出，他感謝老婆謝安琪（Kay）放工煲劇撐場，但他笑言有苦自己知，皆因太好戲而被老婆鬧爆，更建議分房瞓：「Kay試過因為『宋為潮』性格太衰，睇完就鬧我：『咦……乜你份人咁o架！宋為潮！』又因為我喺劇入面嘅打扮太潮，睇完就笑住同我講：『唉！不如今晚你去隔籬房瞓啦！你啲造型太令人印象深刻喇，咁做夫妻唔係幾好呀！』」除了老婆笑言分房睡，Louis連囝囝張瞻（James）都唔畀面：「囝囝每晚都淨係望住電視睇契媽王菀之，仲成日講：『之之姐姐好靚，幾時可以見佢呀？』邊度得閒睇我做成點！」

幸好Louis獲一班街坊讚好戲，埋身氹番自己，他說：「出街嗰陣好多街坊都行埋嚟同我講：『潮潮！我好鍾意睇你做戲o架！你做得好好呀！』真係好多謝大家咁鍾意我呢個角色！」另外，Louis拍劇之餘亦不忘歌手身份，透露趁空檔錄歌，希望下半年可以出跳舞大碟，娛樂歌迷！