新婚陳爽Plan外遊避年

前華姐季軍陳爽日前孖實好姊妹張美妮到海味店辦年貨表孝心，掃了不少戰利品如鮑魚等，認真豪氣！今年首次派利是的陳爽選擇避年，與老公到外地享受陽光與海灘，而美妮則預料拜年時定必被親戚催婚！

春節將至，陳爽與張美妮特意化身「迷人Pink Lady」到西營盤的海味店辦年貨，準備送給親友表孝心！兩位美女甫入海味店即雞啄唔斷，一時研究哪款海參較好，一時又研究甚麼鮑魚菜式，但最令兩人驚喜的莫過是看到巨大心形花膠，陳爽還笑言要買給奶奶以表心意，實是不二之選。雖然最終並無付諸實行，但她倆各自掃兩大袋海味，包括鮑魚、海參及魚翅等。

親戚冇「詐型」

剛成人妻的陳爽指今個新年特別具意義，但卻選擇在新春假期間與老公旅行，她說：「今年會選擇避年，因為老公工作太忙，請唔到太多假，加上之前搞結婚已經好多嘢做，所以我哋諗住喺紅日去個短Trip，當做休息一下，過一個有陽光與海灘嘅新年。」雖然新婚便放棄四出拜年，但親戚也沒有向她「詐型」，還鼓勵她與老公過二人世界。

至於美妮則笑言每逢過年最喜歡媽媽炮製的拿手小菜，故會購買一些山珍海味送給她，讓媽媽大顯身手！問到拜年時會否怕別人催婚，美妮說：「上年佢哋都冇催，但今年就開始有好多人催！依家人愈大，家人都希望我有一個穩定嘅家庭生活，但短期內我都唔會結婚住，因為想為事業衝刺！」