羅苡之後悔Say Yes嫁Otto

去年結婚的藝人陳志健（Otto）與羅樂林女兒羅苡之，今年準備5位數字「還債」，羅苡之笑言不敢避年：「收咗咁多年利是，今年梗係要還啦！結婚嗰陣好多親友幫咗我哋好多，會封大封啲多謝佢哋！」Otto則透露每年年初一都會到老婆姨媽寶珠姐家拜年，今年亦不例外。

談到來年願景，去年經常受傷的Otto笑指打拳安全過打波，他笑說：「上年打波打到爆頭，縫咗16針！打比賽（籃球）又打到手指尾受傷！」他又表示去年於劇集《拳王》得到一個好角色發揮，期望今年也有。羅苡之則戲言最不開心的就是「Say Yes」與Otto結婚：「最黑仔就係Say Yes囉！哈哈！其實舊年各方面都好好，希望可以Keep到啦！」