JC蛇年隨時嫁

Jessica C.（JC）與拍拖半年的男友愛得甜蜜，更暗示不排除做蛇年新娘！肖龍的她坦言龍年犯太歲，令情緒受影響，故於年廿八前洗邋遢，浸Spa驅走衰氣。

有「警鐘胸」之稱的JC雖然是鬼妹仔，但來港多年的她，亦知道中國傳統「年廿八洗邋遢」！但她未到年廿八，便已急不及待要浸個玫瑰花牛奶Spa，一來潔淨身心，二來趕走去年的衰氣，香噴噴、滑溜溜地迎接蛇年。

身為龍女的JC，未知是否因本命年犯太歲，去年不時有情緒問題：「事業都OK，喺情緒方面唔係咁好，有時會好低落，好多嘢諗。」她坦言去年在思想及感情生活上均有大轉變：「由單身變為有男朋友，龍年初嗰時我講過話唔想要男朋友，但到咗年中我嘅諗法已經唔同咗，我渴望得到愛，想有個人支持自己，同我分享我嘅生活，當我需要佢時可以安慰到我。」

相處得開心

JC與現任美國男友Bryce Bond拍拖半年，雖然被迫分隔兩地，但依然愛得甜蜜，她說：「我成日都會好掛住佢，好想佢嚟探我，又或者我飛過去探佢，不過知道大家都要以事業為先，依家係搏殺期。」問到會否在明年拉埋天窗？她暗示不排除做蛇年新娘：「愛一個人當然想同佢有將來，我同其他女仔一樣都會想同深愛嘅人結婚。不過依家未係時候，要努力工作先，佢向我求婚先再諗，如果男友真係飛過嚟向我求婚，畀Surprise我，都會嫁畀佢。」她表示男友很愛錫她，經常逗她笑：「同佢一齊我可以做番自己，感覺好舒服，唔會有任何壓力，我哋又有共同興趣，好夾得嚟，相處得好開心。」

另外，前晚她出席公司團年飯局，她表示情人節當天會對着電腦與身在美國的男友視像會面及食朱古力慶祝。