祖兒子珊索鬥鑽級阿姐
無綫今年落重本大搞蛇年春晚騷，前晚錄影時藝人爭妍鬥麗，容祖兒拋胸，徐子珊騷背，阿姐級藝人則以數百萬鑽飾搶鏡，Sharp爆程度如台慶翻版！
多名藝人前晚在將軍澳電視城錄影無綫的蛇年春晚騷《TVB新春黃金慶典》，包括容祖兒、徐子珊、汪明荃（阿姐）、鄭裕玲（嘟嘟）、葉玉卿、曾志偉、譚詠麟（阿倫）、陳百祥（叻哥）、林子祥（阿Lam）、謝安琪及薛凱琪等。
每逢舉辦大型節目，一眾女藝人都會鬥靚，前輩級的阿姐、嘟嘟和卿卿不約而同穿上充滿喜慶色彩的紅色長裙，三人露肩上陣之餘，更獲贊助閃爆鑽飾。卿卿的紅寶石鑽飾總值160萬，阿姐的藍寶石鑽飾價值360萬，而嘟嘟的梨形白鑽更高達400萬，閃盡全場。後輩則憑索爆Body搶鏡，徐子珊、薛凱琪與前輩「背」道而馳，以大露背示人，但首飾欠奉，祖兒表演勁歌熱舞時穿上露腰舞衣，俯身谷胸！而一頭紫髮的莊思敏穿上白色裙，露肩晒長腿。至於男星代表曾志偉亦不輸蝕，在紅色恤衫貼上數粒星形黃金。
卿卿乖女無緣入行
其後卿卿轉Look換上緊身裙獻唱經典金曲《擋不住的風情》，盡展美好身段，但老貓燒鬚不慎露黑底！卿卿長女胡芷欣全程跟實媽咪，如同小助手。原來這次是女兒首次欣賞卿卿表演，卿卿說：「阿女係全校第一個唔肯表演唱歌嘅學生，佢恨做幕後！佢都同呢個圈（娛樂圈）無緣！」
祖兒忘我演出，俯身時更見「小波地」！
子珊大騷白滑玉背，莫非今年力爭做視「後」？
薛凱琪索開有條「露」，又着露背裝喇！
汪明荃（左）和鄭裕玲低胸上陣兼佩戴逾百萬名貴鑽飾，不讓小妹妹專美。
卿卿先騷身材，再肉緊攬阿倫，風情萬種！
草蜢與祖兒玩到攬作一團，十足大細路。
林子祥（右）獻唱掀高潮，眾星排出人龍陣伴舞。