林峯首認戀千語BB

33歲的「Chok王」林峯首度承認與19歲影壇新貴吳千語拍拖！早前憑冧歌《BB》暗認戀情的林峯，因不忿女友家人遭起底及中傷而豁出去，昨晚高調承認千語BB的正印身份，挺身捍衞女友，更豪情壯語地說：「作為男人要以正視聽，做男人要做嘅嘢。」

林峯與吳千語去年因合作電影《男人如衣服》而撻着，火速被傳過着半同居生活！上月初，林峯首奪「最受歡迎男歌星」後公開多謝「BB」，又在演唱會上對着台下的千語BB大唱冧歌《BB》，自此每提起「BB」都含春甜笑，冧到出面！不過，戀情地上化同時招來是非，女方屋企慘遭起底，吳父被指靠斬叉燒過活，9萬蚊屋租亦全賴林峯接濟。眼見女友受傷害，林峯終決定豁出去，昨晚錄影《勁歌金曲》時突然主動向記者表示有嘢要講，然後面色一沉，Chok出「認真Mode」承認與吳千語蜜運！發表「愛的宣言」後，如釋重負的他笑笑口載歌載舞，更鴻運當頭抽中金蛇擺設！而身在內地拍劇的千語BB則透過助手回應，隔空附和愛郎：「一切以男方講嘅嘢為準！」

「對我好重要」

林：林峯　記：記者

林：（嚴肅）一向工作以外嘅新聞我都唔解釋，前排有部分報道影響到我愛錫嘅人同埋佢屋企人，作為男人要以正視聽！

記：你講BB？

林：（言辭肯定）係！（吳千語？）係！每逢牽涉到我屋企人，我都好反感，呢啲人對我好重要！有報道話我哋一齊租屋（指同居），我係幾唔開心、幾嬲，我冇見過Uncle、Auntie，竟然講到租埋屋，呢樣嘢影響到人哋嘅印象，佢哋亦冇必要被人評論。（緊張瞪大眼）我希望保護女方，今日係要搞清楚情況，好多嘢扭曲咗，人哋家境係唔錯，唔想一個好女仔、一個我關心嘅人畀人誤解，唔希望繼續糾纏喺唔真實嘅事上面。

記：你係同吳千語拍拖？

林：（笑）係！作為男人要做番男人要做嘅嘢！（拍咗幾耐？）一段日子，我想講嘅嘢係咁多，唔係要同大家分享，係想以正視聽。

記：女方唔開心？

林：唔係，我唔希望大家戴有色眼鏡去睇，我自己幾嬲，唔希望有人再作嘢。

記：你冇試過咁高調？

林：冇話高唔高調，只係做番必須做嘅嘢。（見過家長？）我冇帶過佢返廈門，但有撞過嘅。

先斬後奏冇人知

記：點解揀吳千語？

林：佢係好女仔嚟嘅。

記：因為拍戲撻着？

林：好多嘢嘅，呢樣係我私人事，多謝大家關心。（鬆口氣？）都會o架！

記：好多Fans反對？

林：冇聽過，最緊要大家認真對待，相信會祝福我哋。（同公司傾過？）冇喎！公司唔理我嘅私人事。

記：樂易玲知唔知？

林：我係個體，工作以外我有自己生活。（佢幫過你否認。）佢冇否認，但呢樣冇必要去研究喇！

記：女友哭訴？

林：（緊張）冇！大家唔好誤會，冇任何人知我今晚咁講，我有自己主權，身邊嘅人都會支持我，希望追訪適可而止。