舒淇自爆生咗兩個

周星馳在新作中與女主角舒淇緋聞傳得火熱，繼前日獲舒淇公開獻吻，昨晚首映時兩人更加風騷，星爺更向她兩度錫錫，公然打情罵俏，冧到爆！對於有傳與馮德倫秘婚，舒淇即搞笑寸爆說：「仲生咗兩個小朋友添！」身旁的星爺即時嚇窒：「真係沉咗一沉！」

周星馳作品《西遊．降魔篇》昨晚舉行首映禮，監製兼導演星爺聯同舒淇、周秀娜和郭子健等出席，而張達明、林子聰、孟瑤、王子涵和陳爽等亦有捧場。早前星爺為新作連日瞓身宣傳，跑遍中、港、台三地造勢，前日在廣州宣傳時獲傳緋聞的舒淇獻吻，昨晚出席首映，他繼續借緋聞作「武器」，趁機打情罵俏！

首映禮主持黎芷珊笑言要求星爺與舒淇重演獻吻一幕，舒淇即搞笑（目及）實星爺「狼吻」面部半秒，但由於動作太快，徇眾要求下重演，星爺即時「紳士」上身：「不如由我嚟啦！」他在不同角度錫了舒淇面額兩次，場面搞笑！問到兩人關係特別好，他解釋：「冇辦法，我一向都係咁好，舒淇就要睇心情，佢尋日（前日）心情特別好。」至於多次獻吻，舒淇搞笑說：「佢獻面。」星爺聞言即說：「我想獻嘴添！」二人「耍花槍」逗得哄堂大笑！

「真係沉咗一沉」

雖然星爺與舒淇互相獻吻時勁冧，但近日有傳舒淇與馮德倫秘密結婚，問到此事她即時黑面並寸爆說：「仲生咗兩個小朋友添！喺美國，得閒搵人去影啦！（咁有利是收。）係喎！有利是收。（係唔係姓馮o架？）咩都有啦！」對於會否因傳聞不開心，她說：「冇！幾得意，又傳呢啲嘢！」問到與馮德倫的關係時，她即轉移話題：「今日宣傳電影。（講呢啲都可以宣傳。）電影裏面啲女仔都好得意。」正當聽得記者一頭霧水時，她接着說：「你哋求其問，我咪求其答囉！」似乎舒淇未想在星爺面前公開與馮德倫關係，而星爺得悉二人「婚訊」時亦愕然說：「真係沉咗一沉，我都係你哋（記者）講先知。」

否認與郭子健不和

星爺「難相處」是非近期炒得鬧哄哄，其中原本與星爺聯合執導《西》片的導演郭子健，有指出現意見分歧，引致他拍至一半即退下火線，連在《西》片宣傳海報亦被除名，對於不和傳聞，星爺直言未有冷待郭子健：「冇，冇呀！（但連宣傳都冇名？）有！點會呀！有！我哋合作得非常好，拍戲好忙，邊有時間不和。」他又大讚郭子健工作用心，並揚言睇好對方。郭子健在台上亦在星爺面前兩度闢謠：「一直都係星爺Fans，今次係完咗作為影迷一直以嚟嘅夢想。過程唔重要，我其實係嚟闢謠，我哋好好！」

另外，星爺老拍檔田啟文（田雞）曾指星爺孤寒「識計數」，對於叫對方買戲飛一事，星爺說：「我唔記得啦！邊個講o架？（田雞自己講o架！）咁你哋問佢啦！」他又笑言昨天已經派了很多戲飛，暗示並不孤寒。