徐淑敏被雪：工作冇咪算！

自涉掌摑事件後，黃浩太太徐淑敏（Suki）甚少露面，昨日為撐好友高鈞賢場，出席兒童籃球訓練計劃活動，但全程Hea到爆，木口木面兼遲大到外，還只在場邊拍手觀戰及影大合照，老公安排的黑人保鏢又傍到實。有傳無綫偏幫梁烈唯，不替Suki接工作，但她堅決否認，並冷對工作量變少：「我冇特別唔開心，大家唔使理我，工作有就做冇咪算囉！（趁新年去除霉氣？）有師傅話屋企風水整體分數差。（擺陣化解？）拎走咗啲唔好嘅嘢，但冇特別擺陣。」近日心情平靜的Suki又稱與無綫還有「一隻手數得晒」的合約，故未會隱退。