讚Torres可愛靚仔 汪詩詩有衝動再生

甄子丹與汪詩詩前晚有份出席千嬅的生日飯局，詩詩昨日接受電話訪問時，忍不住大讚千嬅的囝囝Torres可愛，她說：「千嬅帶咗BB一齊食飯，之前丁子高經常會放囝囝嘅相上Instagram，尋晚終於可以見到佢嘅真身，現場個個賓客都輪住抱佢，我同子丹都有抱，佢個囝囝又靚仔又乖，全晚冇流過一滴眼淚，個個人抱佢都冇喊。見完佢個BB，令我同子丹都有衝動再生，但返到屋企，諗諗吓都係算啦！不過我好鼓勵千嬅再生。」詩詩稱前晚由於身體有點不適，加上子丹最近拍戲幾乎沒覺好睡，所以二人未等到切蛋糕便打道回府。