鄭融愛是不保留

「人生有幾多個十年」？不少藝人為在圈中佔一席位，往往忽略身邊所愛，幸而入行十年的鄭融懂得珍惜家人及男友，她發表「廚房宣言」之餘，更把所有收入上繳「中央」，也只為活得無悔！

有「樂壇小辣椒」之稱的鄭融一向敢愛敢恨，予人灑脫的感覺，不過原來曾演繹不少「Hit爆」情歌的她，內心卻柔情似水！本身已「出得廳堂」的她，矢志要「入得廚房」，成為賢妻的典範。她去年大方公開與外籍男友的戀情，更認定對方是其Perfect Match，她大讚男友：「因為佢好細心，性格好溫和、好識關心人，同埋好有幽默感！佢係我中學同學，本來冇聯絡，但喺中學聚會撞番，之後就好自然咁走埋一齊。其實我嘅愛情觀好簡單，最重要係搵到一個識關心人嘅伴侶，係咪靚仔有錢都唔係首要條件。」

男友下廚眼甘甘

鄭融更坦言對男友的愛毫無保留：「我拍拖係全情投入，唔可以有保留，就算只係保留20％都做唔到！身邊有人叫我慢慢先好投放感情，否則有啲咩事就會好『痛』。但我覺得唔可以諗太多，唔係話完全唔諗後果，不過既然好愛對方，就唔應該有啲愛係勒住收埋唔畀對方。（你會毫無保留咁付出愛？）會！有幾多愛都會付出晒！」廚藝高超的女人，就有「扣住另一半的胃」的本事，本身廚藝「半桶水」的她，為了廚藝了得的男友，甘願走進廚房，她笑說：「男友煮西餐好叻，不過佢整嘅時候我就得個『望』字。我希望有一日學識煮嘢食，仲要學到大師級Level（水平），咁我整嘅時候，佢就會喺旁邊默默咁望住我，最好佢掉番轉跟我學煮中菜！」

雖然鄭融公開戀情只有一年半，但她早已帶男友見家長，男友更不時與「未來岳母」交流烹飪心得：「我媽咪煮嘢食好叻，會同男友交流烹飪心得，又會傾吓去邊度買餸抵啲、新鮮啲，但我只能喺一邊默默咁聽，因為佢哋煮嘢食叻過我好多，令我有心學好烹飪，想同佢哋嘅距離近啲！我仲希望將來可以出烹飪書，教大家煮健康菜式！」

飲媽咪靚湯開竅

鄭融不僅有貼心的男友，更有一位「On Call 36小時」的媽媽守候，她說：「入行最初幾年，我成日都食無定時，好彩有媽咪煲靚湯畀我飲。以前我會掛住做嘢，忽略咗同屋企人嘅關係，依家人大咗開始識關心人，我會主動約屋企人食飯！我識彈琴同跳舞，都係因為家人栽培。我嘅目標係成為唱作歌手，希望可以喺台上自彈自唱，嘗試作曲！」孝順的她笑言所有收入都上繳「中央」：「我全部收入都交畀媽咪打理，佢畀零用錢我使，咁我就可以專心工作。」

後記：外辣內甜可人兒

鄭融雖然有「樂壇小辣椒」之稱，外表更予人冷傲的感覺，不過入行10年的她在鏡頭背後卻非常隨和及親民。拍攝當日，她比原定時間預早了半小時到場準備之外，每當遇到有粉絲要求拍照時，更有求必應，難怪現場不少粉絲高呼：「我好鍾意你呀！」