狄易達財色兼收

24歲的狄易達習舞十多年，曾因好勝而失手，以致短暫失憶兼「眼殘」。雖然勇闖舞林搞到一身傷，但苦心鑽研Break Dance後，憑着自家招式「達仔Style」而「舞」得美人歸兼開學校殺出財路！

狄易達多年前因為一個「型」字而決意苦練Break Dance 13年，但初入舞壇時，既沒多餘錢上堂，又令父母擔心學壞，他憶述：「我喺屋邨長大，冇錢上跳舞堂，好彩有個哥哥教我。開頭父母都擔心我夜麻麻出街練舞會識到蠱惑仔，最後佢哋索性陪我跳舞。」達仔自嘲發育時期又矮又唔靚仔，幸而從習舞中建立自信，更令他的異性緣飆升：「有兩個女朋友都係因為跳舞結識，其中一個係喺平安夜，睇我跳街頭騷而結識。」但其「死穴」竟是與伴侶共舞：「好怕同女友跳舞，因為好尷尬又易分心。」

愛情得意，身為正職歌手的達仔亦矢志另創一番事業。他近年用血汗錢創立跳舞學校，正式榮升「狄校長」。很多人以為學校是由老闆陳百祥出錢揼本，但實質全由達仔「起家」：「自己死慳死抵儲咗個本，租地方成立學校，再鑽研舞蹈班賺錢，暫時賺咗六位數字，依家已經累積超過一千個學生。」

後空翻失手斷片

提到驚險經歷，達仔表示曾懶理師傅勸告，練後空翻失手以致後腦撞地，即時失去知覺，醒後更短暫失憶：「我打畀女友同埋經理人，但完全記唔起啱啱做過咩，個腦好亂！」表面無大礙的他更即時約朋友食壽司，豈料翌日醒來，視覺上出現殘影：「條頸痛到起唔到身，又行唔到直線，醫生驗到原來我壓到神經線，影響右眼移動。」當年足足閉關休養一個月才「出山」的他，自此留下陰影，不敢再打後空翻。

Break Dance六寶

「跳舞六寶」陪着達仔走過一起練舞的日子，包括防滑軟墊、MP3機、止汗劑、毛巾及飲用水，還有最特別的Sharp爆手套，他笑說：「其實冇乜實際用途，係因為貪靚而買，我多數出騷先戴。」他又透露左腳踭經常扭傷，激舞時很易傷及舊患。他即席除鞋，示範用布帶包紮患處，粉絲見到一定心痛死！