林峯溜冰騷英雄救美

林峯與「千語BB」（吳千語）的戀情逐漸浮面，難怪前日林峯在首爾冒着嚴寒天氣拍攝「示愛歌」《BB》MV時，心情大靚，還親自落場玩溜冰玩花式。

林峯早前借新歌《BB》向吳千語示愛，前日他走遍韓國首爾鬧市及清溪川多個景點拍攝「示愛歌」MV，雖然當地氣溫徘徊在攝氏十度以下，但他依然生猛，先在許願池親試遠距離拋銀仔許願，又到露天溜冰場玩溜冰。林峯在許願池試了幾次即掟中兩次，令他大感興奮，問到是否許願蛇年桃花運旺？他說：「掟中嗰刻太倉卒，冇時間諗，都係許咗事業順利，身體健康囉！」

冰鞋易仆嗌驚驚

其後林峯在溜冰場大顯身手包括後溜等技術，技驚四座，期間見有小妹妹跌倒，他即上前扶起，盡顯大哥哥風度！他說：「自從讀完書好耐冇溜冰，頭先邊溜邊諗番讀書時同同學溜冰嘅點滴。不過，我發覺韓國溜冰鞋同香港設計唔同，韓國啲冰鞋好易仆，我着起都有少少驚。」其後他轉往魚市場拍攝，更親手拿起海產擺甫士，他說：「本來諗住喺韓國拍快歌MV，但時間太倉卒，最終搵咗首中板歌嚟拍，但我冇諗過拍攝咁順利，簡直係超快完成！」

除了林峯在韓國拍《TVB新春黃金慶典》及新歌MV外，日前曾志偉、呂慧儀、金剛及張美妮到台灣拍《TVB新春黃金慶典》，所到之處，吸引大批台灣市民圍觀。志偉除了與愛女曾寶儀放天燈，又與已故藝人柯受良兒子柯有倫品嘗地道賀年食品，提早賀新年。