李蘊濃妝學生妹被圍剿

李蘊為拍攝造型照而化上濃妝，並玩校服誘惑，她本想自拍學生妹Look冧粉絲，卻遭一眾學生發起「圍剿行動」狂插！李蘊不甘示弱，即時作出反擊！

歌手李蘊日前化濃妝及穿上格仔校服裙為舞台劇拍攝造型照，並在前晚上載一張自拍照到社交網站Instagram。她本想以青春學生妹Look誘宅男，豈料因該校服裙與某女子名校相似而引起該校學生不滿，並發起洗板式「圍剿行動」，發布逾二百個留言大鬧她有辱校譽！包括「你在貶低我們的校服」、「唔好着我哋校服，仲要化妝影響校風」。李蘊其後刪除原圖，並自拍大頭照留言：「我們也是品學兼優的好學生。」試圖平息風波。可惜罵戰愈演愈烈，有網民更對她爆粗、人身攻擊及恐嚇：「以為自己可以麻雀變鳳凰，慳啲啦」、「你是希望把事件搞大嗎？後果你自負」、「你要穿都得……但你要畀條命我哋」。而李蘊亦有一班粉絲為她護航，留言力撐偶像。

暗寸「圍剿者」冇品

李蘊昨日接受本報訪問時強調，她身穿的校服並沒有任何校徽及校章：「係造型師畀我着，我都唔知係咩學校嚟，唔覺得自己有問題，只係工作需要。」不甘受辱的她更暗寸「圍剿者」冇品：「學業係重要，但品德都好緊要。我刪晒啲相係因為唔想有啲唔乾淨嘅字眼喺我地方，如果踩親佢哋條尾，真係唔好意思。」對於被人出言中傷，她指男友有給予安慰：「佢好正面同我傾番，佢都明白我做呢行有人鍾意、有人唔鍾意。」惟本報在截稿前仍未收到該名校的回覆。