松岡冧爆認上林德信屋企

歌手林德信（Alex）與日模松岡李那傳緋聞，但二人一直否認，《好報》率先獨家拿下鐵證，「有圖有真相」踢爆兩人前後腳上男方寓所度春宵！事後松岡自然例牌否認，但問到假如Alex追求時，她即時冧到爆！

林子祥之子林德信與松岡李那早已傳緋聞，惟二人不時否認戀事，前日Alex更說：「唔會有發展機會。」不過，昨日《好報》率先踢爆松岡鬼祟到Alex家度春宵！而在上月松岡生日時，Alex曾甜蜜現身松岡在公司舉行的派對，松岡所屬的Girls Kingdom隊友蔡恩真把派對照片上載網上，無意中洩「蜜」！

在昨日《好報》的獨家報道中，發現Alex與松岡及一眾友人聚餐，期間Alex竟撇下松岡先行離開，原來兩人已早有預謀，其後松岡離開即自動自覺行上Alex寓所，就連大廈的密碼鎖亦瞭如指掌，兩人歡度春宵至翌日下午才離開，離開前Alex猶如G4上身，在寓所樓下左(目及)右(目及)，卻未知早已被拍下，自以為安全後便叫仍是濕髮的松岡快步離開。

借朋友過橋

記者昨日致電松岡，她指已經看過有關報道，問到兩人蜜會度春宵？她即解釋：「其實當晚唔只我一個人上Alex屋企，仲有久保杏奈同埋其他朋友，係一個私人聚會。（你同Alex嘅關係？）我哋係好朋友，Alex佢好好人。（有冇發展機會？）將來嘅嘢冇人知！」再問到假如Alex追求會否接受時，她聞言即冧爆，但仍口硬說：「我哋係朋友。」而Alex至截稿前仍未能聯絡得上。