Renee望畀秋生鬧醒

歌手連詩雅的模特兒師妹馮秀華、李蔓瑩及梁鳳妍蛇年各有大計，分別希望在視界、影壇及天橋大展拳腳！李蔓瑩笑言想被影帝黃秋生「鬧醒」，認真有大志！

模特兒馮秀華（Kathy）、李蔓瑩（Renee）及梁鳳妍（Inez）性格及外形不同，發展路向亦有異，分別希望想在視界、影壇及天橋殺出血路！去年Kathy成為無綫遊戲節目《五覺大戰》神獸天使「心思獅」，工作量大增，她希望拍劇升呢：「之前客串咗幾套劇，希望有更多發揮機會，呢排成日練喊，最想同視帝黎耀祥合作！」

至於曾拍攝電影《開心魔法》的Renee外形甜美，去年大學畢業後，現可投放更多時間拍戲，她希望跟影帝黃秋生合作，更不怕被鬧喊：「最想同佢演父女，感覺佢好敢言又照顧後輩，鬧我都唔怕，我鍾意嚴師！」身材高挑的Inez年前從加拿大留學返港，即被睇中加入模界，去年參加世界新娘大賽更勇奪亞軍，她希望憑身材在天橋上發光發亮。

望做電波少女

問到蛇年有何從未做過的計劃？熱愛旅行的Kathy不選浪漫國家，反而想做「背包客」到神秘國度探秘：「想去埃及、印度或者西藏遊歷，打扮好似乞兒都冇所謂，捱吓苦做電波少女！」細細粒的Renee原來非常大膽，想到澳洲一試高空跳傘的滋味：「由飛機跳落嚟，可以俯覽成個城市，感覺一定好好！」養了一頭愛貓的Inez則希望參與動物義工計劃，愛心爆棚！