梁朝偉踩入港大開Talk

梁朝偉昨日大駕光臨港大出席電影對談會，門票瞬間秒殺，候補名單多達600個，偉仔伺機否認與王家衛不和，並表示希望放假與嘉玲做善事。

梁朝偉與動作導演袁和平（八爺）及演員劉家勇，昨日出席香港大學的《一代宗師》對談會，電力十足的偉仔進場時獲逾千師生起立歡呼，他們為一睹偉仔真面目而各出奇謀，逾千門票極速派完，候補名單更多達600個。

偉仔表示是首次到學校分享拍攝感受，對於近日有傳《一》片拍續集，偉仔即耍手拒絕：「演員係需要有新鮮感，再拍同一樣嘢就唔好玩。」他透露會為《一》片宣傳至四月，其後希望放兩個月假進行公益慈善活動：「我試過有兩年糜爛生活，起身就搵人食飯飲酒，食飽就瞓，好冇意義，所以想同嘉玲一齊做公益行善。」有指與王家衛因戲份問題而不和，偉仔帶笑否認：「哈哈哈！真係笑死人，點會呢？同佢咁多年朋友，唔會計較呢啲！」

同甄子丹冇得比

而八爺昨日順道為甄子丹及梁朝偉平反，他指兩人雖飾演同一人物，卻無法分高下：「兩個唔同風格唔同特色，冇得比！」對談會結束後，眾人隨即到旺角戲院謝票，偉仔路經鬧市時，途人爭相拍照，偉仔亦友善地向途人問好：「Hello！」