蒙麵返港激動晒戒

在日本神秘閃婚兼度了三日蜜月的鄭伊健和蒙嘉慧（YoYo）昨晚從東京返港，一副幸福滿瀉的模樣，伊健深知辣慶未有獲邀的兄弟，他透露會在港註冊，並將喜酒「拆件」分幾次，不過一眾兄弟明顯不是味兒，錢國偉更表示要度期！

為避開傳媒耳目，伊健和YoYo一直將婚期當作國家機密般看待，於周一終在日本拉埋天窗，本來預計前晚返港的二人樂而忘返，多留一天。昨晚八時半，向來低調的二人十指緊扣、風騷地步出機場，一身便服的鄭生、鄭太左手無名指戴有設計簡單的銀色婚戒，他們將行李篋交給助手後，便企定定接受記者訪問。

面對半百洶湧而上的傳媒，YoYo頓變小鳥依人，躲在老公身後，將發言權全交給伊健。兩人的「秘婚」雖「奸計得逞」，卻得罪了一班好兄弟，知衰的伊健劈頭第一句就向手足耍冧：「首先要同朋友講聲唔好意思！（會唔會補擺喜酒？）吓！仲嚟？唔係吓嘩！」但他隨即表示會在港找個特別的地方補辦註冊手續，亦會分批和各方好友擺「和頭酒」：「有好多唔同階段識嘅人，會同佢哋分開食，可能『古惑仔』就去大牌檔食！」

未慣被叫鄭太

一直依偎在旁的YoYo難掩幸福，一直望住伊健甜笑，問到其心情時，伊健搶答：「最激動係依家！」YoYo則表示未慣被叫老婆：「有時都會唔記得，叫名就唔會錯！（咁叫鄭太慣未？）今日仲未慣！」問到是否要趕在蛇年派利是？初為人妻的YoYo語出驚人：「乜第一年唔係唔使派o架咩？」當記者笑言要派雙封時，YoYo忍不住Sweet爆撒嬌：「哎吔！嫁錯時間添！」

一對新人固然興奮，但難為了一班被蒙在鼓裏的兄弟，連邀請出席婚禮的「密碼短訊」都沒有收到！對於伊健補請食飯，錢國偉擺明怒氣未消，他接受電話訪問時寸爆地說：「佢請我都未必得閒！我依家忙緊幫電影剪片。不過結婚係開心嘢，祝福佢哋踩單車踩到尾啦！食飯？等我度吓期先啦！」而有份獲邀到日本的黎諾懿表示會出席「喜宴」：「班兄弟話嬲都係講笑啫！如果在港補擺酒梗係參與兄弟團啦！成班古惑仔咁勁！」