遭越洋問價娜姐Say No

娛樂圈再爆風化案！女事主受15萬元利誘以為只需到酒店陪飲陪傾偈，最終疑被迷姦及劫去手機和現金。有模特兒經理人大爆圈中四大問價猖狂手法，而曾被越洋問價的周秀娜，勸喻後輩要識Say No！名模馬詩慧對於有人誤信「有咁大隻蛤乸隨街跳」，深表愕然！

為提高知名度，o靚不惜拋胸露腰騷長腿拍寫真，未知是否予人印象開放，而成為「神秘飯局」目標。上周六於將軍澳發生姦劫騙局，消息指一名25歲女模特兒遭一名自稱台灣富二代以15萬元利誘到酒店飲酒傾偈，酒後卻不省人事，最後疑被迷姦，並被盜去價值數千元的手機及300元現金，警方將案件暫列盜竊及強姦案處理。

事件轟動娛圈，o靚組合冬甩的經理人Admond昨日接受本報記者電話訪問，直指不時有人問價，通常約10萬元「起錶」，他說：「出呢啲價錢梗係有啲玄機啦！容易Sense到嘅，絕對唔接得！」他自稱曾收到類似問價電話，每次均會代旗下藝人婉拒並立刻Cut線：「當然我都會叫旗下嘅女仔小心，盡量避免接觸一啲有古怪嘅人，成日叮囑佢哋要保護自己。」

猖狂4招搵對象

Admond爆料指，問價方法層出不窮，相當猖狂：「手法通常有四種，一係去藝人同模特兒蒲開嘅夜場，私下問目標有冇興趣去食飯，一係就透過WhatsApp同Facebook間接問，猖狂啲嘅會直接打去模特兒公司問價；亦有啲可能本身係過來人（曾出席飯局），佢哋會介紹其他女仔去。」

至於o靚始祖周秀娜叮囑後輩潔身自愛，要識拒絕不道德的要求：「要帶眼識人，遇到有唔舒服嘅嘢要識得推同Say No！」她透露早前在台灣拍戲，收到長途電話着她參與神秘飯局，她即請對方食閉門羹：「有個女人打嚟話有老闆想約我食飯，問幾多錢？我即刻以電話費貴做理由Cut線。」

馬詩慧嘆價值觀出錯

名模馬詩慧則對於是次受騙事件大感摸不着頭腦，她說：「咁都有人信？似乎《警訊》幫唔到人，邊有咁大隻蛤乸隨街跳？佢（指女事主）冇諗過係呃人o架？如果咁都覺得唔係呃人，佢就係自己呃自己！」她指無論涉案男子或是女事主，他們的自我價值觀均錯放了在物質上，以為錢可以買到所有東西。身為三子女之母的她表示，不擔心女兒會受騙：「只要父母識灌輸畀仔女知唔能夠凡事只向錢看就得。仔女讀書唔係為搵大錢，係學做人道理、對人態度同價值觀。」