逗師兄利是祖兒下世紀先嫁

樂壇天后容祖兒昨日與內地歌手周筆暢、前奧運體操金牌選手劉璇及李小鵬於澳門出席新濠天地於水舞間舉行的「非凡之旅」記者會，音樂會將於3月2日舉行，祖兒預告會在高台演唱，但未知會否有畏高而驚到腳震！可會心郁落水表演？她笑說：「係你哋想啫！我未試過喺大家面前着泳衣，守身如玉！」對於當年同拜羅文門下的伊健結婚，師妹祖兒表示事前未有聽聞，但曾在喜慶場合見到他面露幸福：「咁咪可以逗伊健封大利是囉！（你效法秘婚？）我呀？我諗下世紀先考慮啦！（成百年之後？）我唔係咁精心去Plan一啲嘢！（隨時結婚？）唔知o架！（秘婚後先公布？）咁都會！」