嘉樂讚Yo箍掂古惑仔

「蒙麵」於東京秘婚，不過古巨基、錢嘉樂、黎諾懿及陳小春等好友因有工作，皆未能親身到日本恭賀，惟有送上無限祝福補番數！嘉樂更讚蒙嘉慧箍得住伊健，攞滿分！

鄭伊健與蒙嘉慧（YoYo）秘密於東京拉埋天窗，不過一眾好兄弟未能親身到賀，無法前往日本出席婚禮，但一知道二人喜訊後都紛紛送上祝福，當中古巨基火速在微博留言：「心裏充滿感動！恭喜我的兄弟和阿嫂，終於等來這一天了！想起了伊健這首歌，今天聽起來更有Feel：《一生愛你一個》！」

工作困身冇到

而「蒙麵戀」媒人黎諾懿早知婚訊：「因為趕戲去唔到，我知佢哋想搞個好有紀念價值嘅婚禮！我去唔到都唔開心，會送份好好嘅禮物畀佢哋！」歐陽震華則說：「我事前唔知，淨係喺湯盈盈個婚宴上見過佢哋咋！」錢嘉樂說：「我開緊工，啱啱先知！呢排好多好消息，小春就快做老竇，伊健又結婚！（之前畀人話冇腳雀仔喎？）呢啲諗法唔啱，之前都咁話我，但咪逐個做老襯！（蒙嘉慧值幾分？）箍得住陳浩南（伊健在《古惑仔》的角色》）都滿分啦！」

天華叫擺喜酒

「古惑仔」好兄弟陳小春及謝天華分別送上祝福，小春笑說：「我喺上海返嚟啱啱知，佢恭喜咗我做老竇，我先恭喜佢結婚！」天華說：「叫佢喺香港擺番（酒）啦！（催佢生仔？）佢哋諗啦！小春同佢都有喜事，喜上加喜！」