加讚圓圓接柯打「啤」三件

「玩具大王」蔡志明孻子蔡加讚成功向拍拖兩年的女友汪圓圓求婚，作為父親的蔡志明當然開心，更高調表示恨抱孫：「快啲生幾件，最好三件！」看來圓圓婚後要努力造人，全職做「生仔婆」。

蔡志明伉儷及孻子蔡加讚、姪仔蔡加頌及太太、名模諸葛紫岐與老公薛嘉麟、鄺美雲及男友林達民等，前晚出席名人婚宴。所謂人逢喜事精神爽，加讚兩星期前向拍拖兩年的女友汪圓圓求婚成功，將榮升老爺奶奶的蔡志明夫婦都非常開心。記者欲上前採訪時，他們笑說：「趕時間呀！」未知是否趕着籌備豪門婚禮呢？

愈早愈好

本報致電蔡志明恭賀他快娶新抱，心情大好的他說：「冇咁快！佢哋訂咗婚，我今日見報紙先知佢哋結婚，總之佢同我講訂咗婚。」他又大讚圓圓很乖，且二人感情很好：「我當年都係廿八、九歲結婚，同加讚依家都係差兩、三年，叫做完咗心願。」他坦言對訂婚細節及婚禮詳情均不清楚：「佢（蔡加讚）話：『老竇，結婚先講啦！』」但他揚言恨抱孫：「愈早愈好，快啲生幾件，最好三件。（圓圓有壓力？）咁後生，可以慢慢生，我鍾意熱鬧！（你有外孫。）冇乜所謂，外孫、內孫都好。」

而與老公拖手到場的諸葛紫岐，被問到送甚麼給一對新人？她說：「送錢。（農曆新年去邊？）會留喺香港。」鄺美雲則表示買了禮物給一對新人，新年亦會一如以往探訪老人院。