洪天明剪臍帶臨陣縮沙

周家蔚昨午剖腹誕下七磅六安士愛兒「TJ」！BB頭髮多多兼鼻頭有肉，長得與爺爺洪金寶十分相似。榮升父親的洪天明原本打算親手為兒子剪臍帶，可惜最後卻「笠水」打消念頭。

娛樂圈再添喜訊！藝人周家蔚昨晨八時許在丈夫洪天明陪同下入院，下午剖腹誕下7磅6安士愛兒「TJ」。TJ頭髮多多兼鼻頭敦厚多肉，與爺爺洪金寶勁似樣。洪天明在太太臨盆前受訪時表示，原本打算親手為BB剪臍帶，但聽過謝霆鋒的意見後，感覺像親手傷害BB，相當殘忍，故仍在考慮中。直到下午三時十五分，天明帶着興奮心情向傳媒宣布榮升父親，問到最終有否親手剪臍帶？他說：「冇呀！醫生唔畀。（擇吉時開刀？）唔係，我同太太都係基督教徒，因為BB個頭大，所以比預產期早啲出嚟。」他透露原定自備器材到產房拍攝過程，可惜亦因衞生問題被拒，最終由護士代勞。

問到刻下心情，天明坦言第一次聽到兒子的喊聲感到相當Touching：「見到佢白雪雪咁，我啲眼淚水湧住出嚟！因為係開心事，所以都忍住，成件事好神奇、好感動。」他指當日太太照超聲波時見到仔仔「大支嘢」，即與鄭嘉穎分享，誰知對方開玩笑指「小心是黑人」，天明說：「好感恩！囝囝身體好健康，好白淨、手腳好大又好有力，喊聲好似動物園啲鵝咁叫。個樣好似洪金寶，可能未收水啫，收咗水可能似我或者似家蔚。」他自言因有點感冒，仍未有機會錫錫兒子：「原來BB出世要瞓箱四小時，我叫老竇傍晚先嚟醫院探BB。」

爭改名與父「打交」

而有孫抱的洪金寶心情大靚，在太太高麗虹陪同下見傳媒，問到是否開心到流口水時，他笑說：「冇興奮到流口水！（孫仔似你？）當然啦！我咁靚仔，但我冇抱到，依家啲流感、細菌咁厲害，唔敢輕舉妄動。」提到改名，他坦言仍考慮中，又笑言跟兒子天明各有想法：「兩父子打一場先，邊個贏就邊個話事！」其後有感而發地說：「其實做人嘅嘢冇乜所謂……最緊要見到面，講真都唔知邊個去先。」

另外，陳小春昨日在上海為節目《武林爭霸》錄影時，被另一嘉賓徐若瑄踢爆快將做老竇，隨後他開心承認太太懷孕三個多月！問到想生仔定女，他笑言沒所謂，但生仔會好一點。小春太太亦在微博報喜，並透過經理人表示婚後一直想生BB，趁早生可追多個，目前已全面停工，將在港分娩。不過，她埋怨小春玩踢爆，原本打算情人節才宣布，嚇得他即在微博耍冧：「別動胎氣，下次不敢啦大人！」