朱茵壓力大冇餵人奶

逾9個月未有公開露面的朱茵昨晚首次「復出」出席公開活動！產後近4個月並收身不少的她透露愛女名字，由她與老公黃貫中各取中、英文名「黃鶯」及「Debbie」，又自爆怕大壓力而未有餵人奶，現時兩公婆齊齊努力賺「奶粉錢」，有女萬事足！

朱茵自去年4月機場宣布有喜，至同年10月為黃貫中（Paul）誕下愛女「叉燒包」後，一直深居簡出、湊女為樂，未曾公開露面，至日前終於被本報獨家拍得她與老公外出為愛女搞百日宴！千呼萬喚始出來的朱茵，昨晚首次正式「復出」見人，出席澳門喜來登金沙城中心酒店「宏地樓」的竣工典禮，同場有古天樂及袁詠儀，三人一同剪綵及打手印。

囡囡智慧與美貌並重

身穿黑色長裙晚裝配3吋高跟鞋兼留有一頭清爽短髮的朱茵，神采飛揚兼收身不少，她透露為囡囡取名「黃鶯」：「係我改嘅，鍾意個名響啲，而且我一向好鍾意呢種雀，覺得佢哋又靚又有智慧。」又笑言曾想過改「黃晶」，但已經有人用了。而囡囡的英文名則由老公負責，她說：「Debbie係阿Paul改嘅，代表Daddy's Baby，同埋因為佢好鍾意有個歌手都係叫Debbie，我都好贊成，因為連老人家都會識叫。」

朱茵憶述女兒誕生令她感動落淚：「佢出世重6磅10安士，阿Paul全程陪住我，見到BB嗰刻，眼淚忍唔住流，覺得生命好奇妙！」她大爆阿Paul亦感動得流下男兒淚，並笑言只是望住囡囡已感滿足！

見朱茵產後近4個月已收身不少，連手臂等難減位置都未現肥肉，她自信地說：「佗BB重咗17磅，臨生前我谷到20磅，依家距離未生前只差3、4磅。」她指自己「好乖」，坐月坐足100日外，連湊女、餵奶及洗奶樽等都親力親為，不過她透露未有餵人奶：「個奶媽都有問，但我覺得餵人奶大壓力，又驚自己唔夠奶，如果媽咪病咗，個女都會病埋，更加重要係奶粉老公都可以幫手餵，不過阿Paul佢乜都識晒！」

有贊助無懼「奶粉荒」

對於近日香港現「奶粉荒」，她指幸好有贊助，並表示現時兩公婆都要努力搵奶粉錢，又指女兒似自己：「初時睇對眼係單眼皮都好擔心，因為阿Paul係內雙眼皮，總之就覺得佢成日引我哋笑，就連嘔奶都好得意！」另外，粉絲昨日見到朱茵現身即拍照放上微博，更大讚偶像又靚又友善。