朱璇選「宅」享受單身

前華姐冠軍朱璇給人活潑開朗的感覺，但她卻自認是宅女，平日愛看書及看電影，現時單身的她不急於拍拖，反而父母替她焦急，常致電給她打探其感情狀況！

華姐出身的朱璇予人感覺樂觀開朗，常常大笑，不過原來她是一名文靜的女生，她更自嘲是宅女一名：「一般人可能覺得我成日笑，不過其實我係好靜，平日唔太多講嘢。我絕對係好宅，情況仲愈來愈嚴重。以前間中會出去玩，依家反而鍾意去啲安靜嘅地方，可以去睇吓海，散吓步！」

自言以看書及睇戲為樂的朱璇深居簡出，單身的她會否怕難交男朋友？她笑言並不急於拍拖，但「皇帝唔急太監急」，原來朱璇父母對女兒的感情生活非常緊張，經常致電給她打聽，她說：「爸爸媽媽有時會打電話畀我暗示吓，佢哋會問：『做緊乜嘢？係咪得自己一個人？有冇同啲朋友出去？』可能佢哋擔心我成日宅喺屋企！」

膽生毛獨闖歐洲

以為朱璇不玩不蒲，乖乖女性格的她又怎會做出甚麼瘋狂事？但她竟試過獨自遠赴歐洲四圍捐窿捐罅兼毫不慌張！她說：「我試過一個人去意大利、荷蘭、比利時等地，我唔覺得驚o架！我覺得人係可以吸引同類，只要你個心唔係想害人，都唔會吸引到啲想傷害你嘅人。」