陳偉霆畀一夜瘦20磅考起

陳偉霆與梁烈唯昨日出席新片《重口味》開鏡，前者目前兼顧另一新片《特種救援英雄》飾演健碩消防員，但於《重》片中一個故事《毒菇求愛》中卻要減磅扮道友，還初嘗跳脫衣舞：「雖然學跳舞出身，脫衣舞就未跳過，真係考起！導演仲要我減20磅，兩部戲可能疊期，我點可能一夜間肥瘦相差咁遠？」他透露早前為《重》片試戲服，卻冇一件着得入。

而梁烈唯與苟芸慧合演另一故事《有殺有賠》，除了露兩點，又要激凸露底，甚至露股罅演出，他說：「呢部係瘋狂喜劇，唔係三級片，露股罅都可以接受。」苟芸慧則笑說對方拍露肉戲時會去探班。同場的孫佳君於另一個故事飾演揼骨妹，而陳靜密實亮相，自爆有新戀情。