陳偉成Mia疑爆床照

周秀娜高調宣布與男友陳偉成（Avis）分手後，Avis被揭情史一籮籮，昨日網上更流出Avis與娜姐師妹陳靜儀（Mia）的疑似床照，難怪Avis昨日復工時驚驚青青！

雖然周秀娜強調與Avis分開與第三者無關，可是Avis情史愈揭愈多，繼與o靚模羅彩玲（Vivian）流出「床照」後，曾與Avis傳緋聞的失婚模媽Mia日前遺失電話，昨日網上便瘋傳她與Avis的疑似床照，相中可見二人赤膊躺在床上，Mia更似是倚在Avis胸懷，他狀甚「疏乎」。

閉關三天的Avis自失戀後首度露面，昨午5時到位於佐敦的髮型屋開工，可是全程頭耷耷兼殘爆，受訪時更甚為驚青，並拉記者入後巷。問到為何潛水？他說：「因為冇乜心情，始終六年情，真係好唔開心！（有小三搞到分手？）其他嘢唔想講喇，總之呢件事唔關第三者事，完全因為兩個人之間感情轉變，分開就分開啦！」可是談到Mia遺失電話一事時，Avis突然口窒窒，堅稱不擔心有「蜜照」曝光：「我……我同佢只有工作上嘅接觸，私底下冇乜聯絡，總之一張相都冇（指床照），唔關我事！（一年攬幾多女？）唔想講太多！（流出同Vivian嘅相？）人哋點宣傳我冇辦法，我哋根本冇聯絡，只可以講係我唔小心！總之我依家單身，如果有拖拍會同大家講！」說罷便衝入髮型屋開工。

執手機重酬五萬

另一邊廂，Mia昨午接受電台訪問時，講述遺失電話的經過：「應該漏咗喺的士度，部電話有珍貴嘅相，包括私生活同工作相，真係好擔心，希望的士司機可以還畀我，如果有好心人執到，我會重酬五萬蚊！」對於網上流出與Avis的疑似床照，她昨晚在電話中慌張地說：「唔記得入面有乜相！（係咪有同Avis嘅床照？）只希望執到嘅人快啲畀番部電話我！」

而Mia的經理人Roy接受本報訪問時，對於流出疑似Avis與Mia的床照，他說：「唔係啩？係咪畀人移花接木？要問番當事人，呢兩日我都搵唔到Avis，我知Mia唔見手機，但未必有好激嘅相！」當Roy向Mia了解後再回覆本報：「佢話手機係有唔同嘅相，話自己未睇過張相，唔會回應太多！」又表示不知道二人的關係，對於網上瘋傳床照，他說：「可能係整蠱，我信佢哋！」