阿倫約食飯 秋生嗌Stop！

校長譚詠麟（阿倫）本想充當和事老，欲為傳不和的羅志祥（小豬）及黃秋生擺「和頭酒」，卻被秋生狂寸多事，被寸到上心口的校長昨日大方笑說：「我不嬲都多事！」更笑言「山水有相逢」。而秋生對此事卻早已煩到怕，一聽校長回應時即時「喊驚」：「Stop！」

樂壇校長譚詠麟日前在「亞洲舞王」羅志祥（小豬）的演唱會中充當和事老，指要為小豬與傳不和的黃秋生擺「和頭酒」，食飯玩鬥地主一「炸」泯恩怨！但前日秋生得知此事後毫不領情，除指校長貪口爽「亂咁噏」外，更謂對方冇事搞事，自己懶得理會。

慘食「檸檬」的校長昨日出席餐館《尚品薈》的開幕儀式時，被同場的曾志偉借此事取笑，而昨日捧場的還有李克勤、曾志偉、陳百祥、黃杏秀、苗僑偉、梅小惠、Mr.、經理人兼藝能老闆張國忠、寰宇老闆林小明和電影公司老闆黃百鳴等，星光熠熠，場面熱鬧。

大家Happy吓

對於秋生表示唔熟，只是「九世前」曾合作，校長說：「娛樂圈係一個大家庭，總有機會見到面，唔明白秋生講咩好耐冇見，大門永遠都會為佢打開。」他表示約會秋生與小豬食飯絕不是貪口爽，他透露雖沒有秋生電話，但確曾嘗試經助手約會對方，他又搞笑說：「想大家Happy吓，25幾歲人都係開開心心！」

喺佢身上學嘢

至於被秋生指多事，校長笑說：「我不嬲都多事！」他表示就算小豬事忙未能出席，他亦可以先行約會秋生：「山水總會有相逢，等佢嚟食嘢，有中菜、西菜、日本菜，大門為佢而開。我同秋生玩住先，有二人鬥地主o架嘛！」但校長表示未敢請對方看自己的賀歲新片：「佢影帝嚟！唔使啦！我喺佢身上學嘢！」

而記者致電秋生時，他一得知校長回應時即時「喊驚」：「吓！又講！唔講啦，唔講啦！Stop！Stop！唔想件事沒完沒了！」看來秋生對此事早已煩到怕，校長約食飯隨時愈約愈走！