阿倫訓示小豬擺和頭酒

「亞洲舞王」羅志祥因在演唱會上狂問「我是誰」而被黃秋生暗寸「茂利」，譚詠麟前晚擔任小豬個唱嘉賓時做和事老，提議擺和頭酒，豈料反被秋生鬧多事兼跟他劃清界線，秋生更認老求饒，大叫「畀條路我行」！

羅志祥（小豬）一連四場「羅志祥《舞極限》世界巡迴演唱會— 香港」前晚終於曲終人散，最後一場請來「樂壇校長」譚詠麟（阿倫）做嘉賓，眼見小豬與黃秋生的爭拗沒完沒了，譚校長就「和事老」上身即場訓話：「聽講你同我個老朋友有啲過節，其實黃生係個好有『倒裝』文采嘅人，人哋話你茂利，倒轉讀其實係讚你有『禮貌』！」全場Fans聽到此「爛Gag」立即起哄，校長續說：「做人唔好咁計較，等我搵日搵我個Friend，即係姓黃嗰個茂利同你High個Tea，閂埋門鬥地主，炸到佢冇得翻身！有這個量度嗎？」一直低頭受教的小豬猛點頭說「OK」，校長最後再拋金句：「有多大量度，成就就多大！」小豬完騷後在後台解釋一向喜歡在個唱上問「我是誰」來炒熱氣氛，又自稱「後輩」，指會聽前輩的說話，若真有「和頭酒」會出席。

然而另一主角黃秋生昨日在電話訪問中得知「老朋友」譚校長幫口拉攏擺和頭酒時，他就怪責校長多事：「佢亂噏你哋就當真，我同佢又唔熟，九世前拍過戲，我同曾志偉熟啲。本來就冇事，都唔知提佢嚟做乜！冇事搞事，我都費事理！」當問到對金句「有多大量度，成就就多大！」有甚麼看法時，他開始扯火說：「迷思嚟喎！根本冇關係，依家發生乜事先？好笑，話我借佢（小豬）炒作博宣傳，我開演唱會咩？我日日喺屋企炒餸，我炒作嚟等我個仔知我係佢老竇呀？」

發動3,000人講粗口

愈講愈慶的秋生連校長都鬧：「佢根本唔知咩事，講嘢前諗吓，會惹起事端o架，譚詠麟哥哥！又唔知緣起，我只係話《賽德克·巴萊》好睇，啲人就喺我微博話我鬧人，等如譚詠麟話做和事老，我發動3,000人去佢微博講粗口，佢抓唔抓頭？」秋生其後又求饒：「我真係唔想再同呢件事有任何關係，我求嗰啲傻嘅、癲嘅，唔好再滋擾我，我依家精神上畀人非禮呀！我年紀大、老喇，行唔郁喇，讓吓我啦，我知錯喇！」