縮水付蓉寸胸大冇用

《ATV 2012亞洲小姐競選總決賽》佳麗昨日以三點式會見傳媒，(2)葉詩琪因驕人上圍被睇高一線，而減磅致令上圍縮水的(13)付蓉說：「女性美唔單單在於胸部大細。」

十八位亞姐佳麗昨日以三點式會見傳媒及投票選出友誼小姐，並為今晚舉行的《ATV 2012亞洲小姐競選總決賽》進行拜神儀式。上香期間，(12)許麗莉因宗教信仰未有參與，呆在一旁的她險被大熱之一的(11)齊真晨辣親，差點破相！至於(2)葉詩琪每到泳裝環節便以驕人上圍傲視同儕，故被睇高一線，她說：「臨近決賽，有少少緊張。我希望選完可以快啲返屋企，因為我兩個月冇返馬來西亞。（怕唔怕頸背紋身有影響？）冇辦法，就算選完大中華要洗都唔夠時間，若果當選，同亞視有合作嘅話就會洗紋身。」

陳瑪莉紅唇吸睛

最近成功減磅的另一大熱(13)付蓉說：「我有信心取得成功，之前一路都有Baby Fat，比賽到依家減咗7磅有多！（減埋上圍？）一定會，不過女性美唔單單在於胸部大細，仲要睇氣質同內涵。」至於「陪襯組」包括(6)韓國佳麗金架昀及許麗莉等，當中以(5)陳瑪莉最突出，嘴唇恍如人肉吸盤兼身懷「腹肌」的她，竟對奪冠充滿寄望，她說：「我有信心向評判展現個人特質，會竭盡所能博得垂青。」

透視旗袍玩噱頭

此外，亞視高層葉家寶表示決賽會進行兩輪淘汰，最後選出4名佳麗爭奪三甲，另設六個獎項供佳麗角逐。他透露決賽將挑戰電視尺度極限，一眾佳麗除穿上泳裝及晚裝外，更會以透視高衩旗袍真空上陣，但揚言絕不會以走光博出位：「我哋出場之前會幫亞姐檢查，做足防禦工夫，仲會確保佢哋以真材實料上陣。」並指決賽定於星期一舉行屬策略性安排，令友台難以調動節目對撼。