娜姐公告6年情玩完

周秀娜與男友陳偉成（Avis）拍拖6年，多次傳出分手，正當分手傳聞近日傳得鬧哄哄之際，娜姐昨晚突然在《第三十五屆十大中文金曲頒獎禮》宣布回復單身，還笑言叫大家可以開始熱烈追求她，據知娜姐前晚才決定跟Avis攤牌，最終忍痛斬纜。

宅男女神周秀娜與髮型師男友Avis拍拖6年，近年娜姐因轉戰內地，聚少離多，有傳Avis為人花弗，在沒有女友管束下經常曳曳，令二人感情轉淡。然而，二人近日常在微博暗示情變，Avis前日表示轉了新髮型，並寫道：「把別人看得太重，令自己在別人眼裏無足輕重！」可是萬料不到，娜姐昨晚為《十大中文金曲》作頒獎嘉賓時，竟在台上爆出單身宣言。

Avis口窒懵然不知

當主持問她感情狀況及是否單身，娜姐說：「係，我依家係單身，我藉着呢個台講自己單身！」當問到還有甚麼要講？娜姐即時口震震，強擠笑容說：「大家可以熱烈追求我！」事後記者致電Avis，問到有否看電視？懵然不知的他說：「吓？冇睇呀！佢講乜？」當知道女友宣布單身，他即說：「我依家做嘢，做完先打畀你！」然後匆匆掛線。其後他在Facebook上載自拍照，並留言：「……………」

其實娜姐前晚出席活動時，當被問到感情是否出現問題，她當時還說：「我哋個幾月冇見，近排好少溝通，但現階段仲係男女朋友關係！」據知，娜姐在活動後便與Avis攤牌，最後忍痛分手。

記者致電娜姐師妹Jeana（何佩瑜），曾與Avis傳過緋聞的她說：「好驚訝，上年聖誕節見佢哋喺黃秋生個舞台劇仲好正常，估唔到會散，知佢哋拍拖咁多年，由細拍到大，既然喺呢度講，分手已成定局。」

Rose爆杜宇航多錶

另外，娜姐、陳嘉桓（Rose）、溫碧霞（Irene）、「三哥」苗僑偉及太太戚美珍前晚出席《香港肝壽基金20周年慈善籌款》晚會，提到胡敏珊被《好報》踢爆與動作男星杜宇航禁室培情，Rose表示師兄十分忙：「我都係睇報紙先知，冇問佢哋。不過師兄多咗錶戴，因為我哋本身有手錶贊助。有次同樊少皇開工，佢都話師兄隻錶靚，仲問咩牌子。（隻錶胡敏珊代理？）係，男裝錶，我都冇師兄咁多錶！」是否看好「姊弟戀」？Rose表示各人有不同喜好，女方年紀較男方大或擦出不同火花。