Taylor唱衰舊愛犯眾憎

鄉謠小天后Taylor Swift出名愛「集郵」，男友如車輪轉，換畫快過換衫的她，更被今屆金球先生Sam Michael的影星老竇米高霍士（Michael J. Fox）警告：「唔准搞我個仔！」

有份入圍今屆金球獎最佳原創歌曲的Taylor，上星期出席頒獎典禮期間，被主持人Tina Fey及Amy Foehler「提醒」不要打今屆金球先生Sam的主意，明寸Taylor愛集郵。前日Sam老竇米高出席活動時亦稱不希望兒子與Taylor交往：「我冇留意佢，但知道佢鍾意喺啲歌入面寫前男友，幾識建立事業吖！」被問到若兒子帶Taylor返家，米高則說：「我根本唔識佢，日後可能會聽到個仔畀人唱『衰過Pat屎』。」

至於早前速撇Taylor的人氣組合One Direction（1D）成員Harry Styles，昨日與1D四子於東京出席記者會，吸引近200名傳媒到場。身為1D歌迷的日本女星堀北真希，穿上和服向五子獻花，Harry亦十分識做，大讚日本女性非常美麗，並宣布11月初於千葉舉行兩場演唱會。

Zayn中途離場

而五子前日抵埗後，已趁機大擦魚生，晚上又唱K狂歡。未知是否玩得太癲，成員Zayn Malik昨日在記者會上感到作嘔作悶，拍照後便中途離場休息。