江若琳封盤等啱嫁

世事又豈能輕易被猜透？25歲的歌手江若琳既有大眼、甜美笑容兼身材均稱，出道不久便榮登宅男女神，緋聞不絕。正當人人以為這「筍盤」應被瘋狂搶購，她竟然「封盤」，更宣布「銀禧盛女」唔憂嫁！

正值花樣年華的江若琳（Elanne）樣靚身材正，照道理應一早被「私有化」，但世事往往難料，入行多年的她依然單身度日。當知道比自己年輕一歲的歌手連詩雅被封「黃金盛女」時，Elanne笑言對拍拖一事仍然冇有怕，更自封「銀禧盛女」，不愁冇人追：「吓！連詩雅都只不過細我少少咋喎！乜依家啲人要求愈嚟愈高o架，佢係『黃金盛女』，咁我一定係『銀禧盛女』喇！哈哈！其實我真係唔擔心，我對於揀另一半嘅要求好簡單，而且香港一定仲有好多好男仔，所以唔驚嘅！」難怪早前透露有人追的Elanne繼續選擇慢慢等，更講到明要與對方多相處、多觀察。縱然香港充斥「即食文化」，但感情慢慢來總勝於快來快去。

口口聲聲擇偶條件低的Elanne，如此一名窈窕淑女，就算君子亦是難求，原來需要過三關！皆因有三個人已佔據Elanne心中很大部分的位置，所以要贏得美人歸，便要凌駕這三位的地位！她坦言婆婆與爺爺都是心中摰愛，無人能及：「我四、五歲嚟香港之前，係爺爺同婆婆佢哋兩個將我湊大，但喺我十四歲嗰陣，爺爺就過咗身，因為我哋嘅感情真喺好深，所以就算到依家都仍然覺得非常傷心。」雖然爺爺魂歸天國，但她與婆婆相濡以沬，不時趁舉行演唱會安慰她：「婆婆！其實爺爺依家都喺天上面睇緊我表演o架！」

母親一言 激勵一鞭

至於第三個人，就是世上只有她最好的江媽媽，Elanne坦言處於最「黑仔」的低潮時期能勉強捱過，全靠母親大人一席話：「媽咪嗰陣同我講，就算我捱唔住，我都係Nothing to Lose（冇嘢輸）！佢仲話就算賣晒所有物業，賣埋住緊嘅樓都可以送我出國讀書，遠離香港呢個是非之地。」得到江媽媽力撐的Elanne大受感動，最後決定留守這是非之地，留守身邊人。

雖然感情暫未有着落，但愛人之道又何須單靠戀愛渠道？Elanne為人偶像，本着「每天都是學習」的精神辦事，她見早前Fans Club有粉絲滋事，即啟發得出愛人妙論：「如果佢用錯嘅方法去愛我，我寧願佢唔愛我，我亦都唔需要佢繼續愛我，但如果佢之後有所反省，想返嚟我身邊，我梗係無任歡迎。」Elanne有人愛，亦有愛人，但此刻未有想像如何再添枕邊人，一切隨心。

後記：睇通睇透

雖然筆者與Elanne只有數面之緣，對她為人亦未算熟悉，但至訪問後閒聊時，她竟洞悉到筆者有所煩惱，並主動分享處事心得：「唔使驚o架！做好自己，唔使理其他人點諗！」此話令筆者發現，原來25歲的Elanne已經非常成熟，相信這位「銀禧盛女」又多了一個Selling Point。