黎耀祥內地「無價」

無綫行政主席梁乃鵬前晚宴請劇集《大太監》台前幕後，藝人黎耀祥、梁烈唯及邵美琪等亦有出席。祥仔表示「太監五子」每次聚首都「雞啄唔斷」，希望能夠原班人馬開新劇：「開個新題材會好啲，冇包袱，如果喜劇會更好。」新年他要留港拍劇，不能到美加登台：「係搵少咗，拉上補下啦！（攞咗3屆視帝加價？）想，不過要陰啲陰啲咁加，一次過加市場未必接受到。」對於有導演指鄭嘉穎在內地有價冇市，祥仔希望大家不要猜測：「內地市場咁大，冇人知實價，我都係『無價』，因為我從來都未喺內地拍過劇。」至於有份演出電影《古惑仔：江湖新秩序》的梁烈唯希望票房達800萬：「希望可以開續集，最多我哋減價。」問到與黃浩官司的進展，他說：「我都好想知，不過律師都冇聯絡過我，所以冇新消息。」