惠林遲到Miss咗車勝元

韓國女子組合Wonder Girls成員惠林前晚出席Party，由於姍姍來遲，令她與同鄉車勝元緣慳一面，難怪單身的她大嘆失望！

前晚中環星光熠熠，三位國際影星包括憑《擊情》及《沒哭聲的抉擇》兩奪奧斯卡影后的希拉莉詩韻（Hilary Swank），憑《鋼琴戰曲》奪奧斯卡影帝的艾哲倫保迪（Adrien Brody）、「宇宙最強」甄子丹，韓國人氣型男車勝元、韓國女子組合Wonder Girls（WG）成員惠林、大美人李嘉欣及丈夫許晉亨等，雲集中環八號碼頭香港海事博物館出席意大利珠寶品牌BVLGARI派對。大會還安排了魔術師David Jarre及英國爵士樂及福音歌手Gena West表演，場面盛大！

姍姍來遲的惠林，抵埗時車勝元已離開，她坦言失望：「我有睇佢啲戲，好鍾意佢！我哋有個Common Friend係牧師，算係間接認識，喺韓國見過幾次，但冇合作過！（有冇拍拖？）依家單身，香港男仔好Nice！（搵個香港男仔做男友？）如果對方係合適嘅人，都唔介意！」她表示今次來港兩周：「放假有咁大型活動，當然會參加。屋企人都喺香港住，順便來港傾吓有冇合作機會！」

嘉欣（目及）仔眼都花

另一邊廂，嘉欣與亨亨離開時略帶醉意，問到場內有艾哲倫、甄子丹及車勝元等好多型男？嘉欣笑說：「係，眼花繚亂！不過我隔籬有個，我唔敢講。（老公介唔介意你咁性感？）我諗佢唔介意，我咩Look佢都見過啦！（囝囝有冇讚你呀？）囝囝好早就瞓咗喇！」她還大讚希拉莉與艾哲倫均毫無架子，亦有跟二人聊天。至於大家可有合作機會？她則說：「難啲，咁忙！睇佢哋嘅戲支持佢哋啦！」