胡敏珊杜宇航密謀換竇

鐘錶界美女胡敏珊與動作演員杜宇航，被《好報》獨家踢爆姊弟戀！因練功而斷腳的杜宇航，被拍得連續6日留在女友的西半山豪宅「培情」，胡敏珊更親自送玩到腳軟的愛郎返家才放心離開，相當癡纏！昨日，二人有默契地解釋只是上門做「靈修治療」！

現年41歲的鐘錶界女強人胡敏珊，以往傳過緋聞的男士個個非富則貴，但她最近轉口味嗒「精壯男」，被逢周五出版的《好報》獨家拍得與32歲的動作演員杜宇航，在西半山香閨禁室「培情」玩足6日！事件曝光後，二人的關係迅即在社交界瘋傳，有人更指杜宇航的手機桌面是胡敏珊的照片！

夾晒口供稱靈修

記者昨日致電胡敏珊，她未有接聽，只以短訊回覆：「I just read it. Crazy. So angry. I did some clearing for him.（我剛剛看了報道，很瘋狂，很生氣。我是為他做靈修治療。）」記者其後再致電，她終開腔回應，強調只是為對方做靈修治療：「我一直有讀呢個課程，半年前開始做，喺屋企做係因為屋企乾淨，幫過好多人做，同佢係朋友。（點解喺屋企幾日？）佢係分開兩次嚟，每次做兩個鐘，因為兩個鐘已經好攰。屋企有兩個門口，所以影唔到佢出入。」問到杜宇航為何要做靈修治療，她說：「做完個人開心啲。（日後避忌唔留喺屋企？）可能要，但屋企有『架生』。」她更自爆《好報》刊登後有不少人匿名送花，笑言未知是否追求者怕她名花有主，故急急示愛！

至於杜宇航亦與女友夾晒口供，他說：「係做靈修治療，但冇6日咁耐。（靈修治療係做啲乜？）將負能量清除，靈魂潔淨，除咗我哋，仲有師傅喺度。（跛住腳都去？）有車車我，又約咗。（同胡敏珊係咩關係？）朋友。（胡敏珊話可能要轉地方？）都好，啱嘅。（佢知唔知你離過婚？）過去唔提。」

師傅早知離過婚

而杜宇航的師傅兼經理人冼國林，揚言對徒弟的戀情不知情，他認為若二人真心相愛，年紀不是問題。談及杜宇航曾結婚一事，他表示4年前已知道：「當時我仲幫佢搵律師搞離婚。（佢刻意隱瞞？）唔係，係我叫佢私人事唔需要周圍同人講。」

杜宇航

年齡：32歲

背景：葉問之子葉準的徒孫，6歲開始習武，12歲加入港隊，曾獲多個武術獎項。2010年獲師傅冼國林發掘，參與電影《葉問前傳》擔正做男主角，並入圍《香港電影金像獎》最佳新演員。

胡敏珊

年齡：41歲

背景：被譽為「鐘錶界美女」，1999年與友人及美國公司共同代理鑽石膠錶，迅即紅遍香港名人潮界，2006年更被同業推薦為香港鐘錶商會的會董，又曾獲世界傑出華人獎及年度企業家獎等。