張暖雅唔要「冇品」男

性感女星張暖雅不時到馬來西亞打碟，她早前再次到訪當地，更嘗遍地道美食，足足重了十磅！她大讚此行的「米飯班主」既友善又細心，但覺得當地人「貪玩」，因此不會找他們做男友！

張暖雅（Angelina）最近頻頻出埠打碟，她早前再次飛往馬來西亞五天，獲當地的主辦單位安排勁食團，嘗盡馬拉地道街頭美食。她大讚當地某間看似飯堂供應的平價自助餐美味，令極累的她胃口大開：「嗰日好眼瞓唔太想食嘢，陪朋友去到咪求其揀啲嘢食囉，點知一食醒晒！啲咖喱魚、咖喱羊腩真係好好食！」

偏好重口味

由於不時都要穿着貼身裙出席活動，為免凸出「肚腩仔」，每次出騷前她都不敢進食，完騷後才敢大吃大喝。她又說：「之前公司要我減肥，成日唔食嘢，搞到我有少少厭食症。（今次勁擦咪破戒？）每次出Trip兩、三日都會破戒，今次都食大咗個胃，返到嚟都不斷食，依家重咗10磅，就快有100磅啦！我皮膚黑、太肥會好似菲傭！」從她的照片中可見其消夜美食滿布辣椒，她自言無辣不歡：「香港啲嘢食好淡，所以食茶餐廳都好悶，平時我會買大堆唔同嘅辣椒嚟煮麵食，刺激吓味蕾。」

Angelina大受當地夜店客歡迎，她亦讚他們熱情：「佢哋好Nice，會好用心聽你講嘢，簡單過香港同上海人。喺夜店佢哋仲會望住你打碟，向住你跳舞。（會揀馬拉人做男友？）絕對唔會！我唔鍾意男仔貪玩，唔上進。同埋佢哋好冇Taste，打扮好求其。（去蒲都唔識打扮？）佢哋係亂着！我都係鍾意有型、有Quality（質素）啲嘅。」