何傲兒舞劍做保鏢 演律師圓夢

何傲兒在劇集中作新嘗試，飾演一名打女律師，她表示做律師向來是其心願。而肖龍的她更被相士指今年行桃花運！

無綫小花何傲兒拍攝劇集《神槍狙擊2013》，今次更有突破性演出，外表斯文、靚靚的她，既是一名律師，又是一名打得的保鏢，但伊人坦言不怕辛苦，反而開心。首次飾演律師的何傲兒說：「做律師我係第一次，但選港姐時我都曾經公開過我嘅志向，就係做律師，入行以來我一直都等緊呢個機會，終於畀我等到，個角色仲要係識打嘅，真係特別同開心呢！」問到拍攝動作場面前要否惡補一番？她說：「其實之前我都跟盼盼姐（楊盼盼）學過，仲有學過耍劍，只要拉番鬆啲筋，我諗都應付得到嘅。」談及做律師難免要拍一些台詞冗長的戲份，她非常放心地說：「我諗呢啲都唔會太難，我自問記性都幾OK，自己死背，一定熟讀為止先入廠。」

等行桃花運

農曆新年將至，何傲兒表示本來很想與家人一起去旅行，但因接了工作而作罷。她又透露之前拍攝賀年節目，相士指肖龍的她今年會行運，令她興奮不已！問到相士有否指她有桃花運時，何傲兒說：「佢話有呀！不過我希望啲桃花都旺喺事業上，我依家冇拍拖。（後生女唔恨拍拖咩？）恨o架！我承認都有唔少追求者，不過自己想工作為上，如果有啱，都想了解深入啲先，不過就算拍拖，我都唔會公開。」