Eason懶理粉絲嘲脫節

入行18年的陳奕迅（Eason）被捧為歌神，可是歌神也有被插時！Eason前晚與容祖兒出席音樂頒獎禮，雖然雙雙成為大贏家，但他在台上竟自爆被粉絲喪嘲歌曲跟時代脫節，Eason一於少理力撐唔覺，還刻意晒腩又唱又跳，證明自己走在時代尖端！

繼許冠傑和張學友後，Eason接棒被捧為歌神，入行踏入18年的他幾乎擸盡樂壇所有大獎。可是面對樂壇不景氣，連唱片連鎖店龍頭HMV都要申請破產，Eason前晚出席《微博之夜-SINA MUSIC樂壇民意指數頒獎禮2012》時，雖然和天后容祖兒同奪4.5個大獎成為大贏家，但坦言有粉絲對他有微言，被寸跟時代脫節。Eason在台上邊攞獎邊自爆慘被「神粉」寸的一幕，不禁令他黯然神傷：「最近呢，有Fans猛讚我2005、2006年嘅歌好正，但呢一兩年歌就紅喇！覺得有啲脫節囉，不過我唔覺o架！只會返去檢討一下，例如聽多啲農夫嘅歌！」未知Eason是否要證明自己走在前端，跳唱快歌《重口味》時竟全程忘我，還不經意地晒腰間厚厚的肥腩，超重口味並非人人受落！

唱片難做撐得就撐

接受訪問時，Eason被問到有關HMV面臨結業的問題，即慨嘆做唱片艱難：「我唔會頂o架（經營HMV），平時都盡撐，成日幫襯買碟！不過真係有啲可惜，可能依家唔興啲大唱片舖！我好後悔搞製作公司，公司只得我一個歌手係唔難搞，但都係唔簽其他歌手住，睇番情況先，反而HMV申請破產，令我諗到點經營公司！」

問到有沒有收看《勁歌》總選？他說：「只係睇王菀之（Ivana）攞金曲金嗰Part！」又笑言看不到祖兒「O嘴」那一幕：「我部電視得6吋咋！睇唔到！」對於Ivana被抨擊，Eason認為歌手做甚麼都有機會被批評：「畀人評評吓就慣，有邊個唔畀人話，出得嚟行，預咗畀人彈！」對於陳慧琳指無綫應Cut「亞太區最受歡迎歌星獎」，他說：「應留畀TVB音統處決定，其實我係一條又長又幼、掘頭又冇攻擊性嘅軟膠草。」

奪國語專輯獎驚喜

至於同樣成為大贏家的祖兒，在奪國語專輯獎時突然打個突，在旁的蔡卓妍即說：「今次唔好O嘴喇！」祖兒笑說：「我今次真係O嘴喇！如果攞廣東專輯咪就好，大家都知呢個年頭做唱片唔一定賺，會蝕o架！我國語碟都領領哋（嘢）！」祖兒強調在《勁歌》總選「O嘴」並非唔抵得Ivana攞獎：「相信Ivana都冇諗過自己攞，唔係唔抵得，佢係我好朋友，開心都嚟唔切，但我唔知點解會O嘴，直情唔記得自己講乜，總之入十大金曲已經好開心！」問下次會否掩嘴免被讀唇？她說：「我個人冇咁有計劃，如果唔係就唔會衰咁多次！」